مکہ مکرمہ میں ہونے والی بارش سے سردی کی شدت میں اضافہ ہو گیا۔

تفصیلات کے مطابق منگل کی صبح مکہ میں ہونے والی بارش نے مکہ کا موسم خوش گوار کر دیا ہے۔

گذشتہ چند دنوں سے مکہ کا موسم گرم تھا لیکن اچانک ہونے والی بارش نے مکہ کے موسم کو خوشگوار بنا دیا ہے۔

عمرہ زائرین نے ہلکی بارش میں طواف کعبہ کیا اور میزاب کعبہ کے نیچے کھڑے ہو کر دعائیں مانگیں۔

زائرین نےبتایا کہ موسم بہت اچھا ہونے کی وجہ سے کعبے کا طواف کر کے بے حد لطف آیا۔

یاد رہے کہ محکمہ موسمیات کی جانب سے گذشتہ روز مکہ ریجن کے مختلف علاقوں میں ہلکی اور درمیانے درجے کی بارش کی توقع ظاہر کی گئی تھی۔

اس کے علاوہ جدہ کے مختلف علاقوں میں معمولی بوندا باندی ہوئی جبکہ طائف، اللیث، رابغ، خلیص اور میسان کے علاقوں میں بھی ہلکی اور درمیانے درجے کی بارش سے موسم غیر معمولی طور پر خوش گوار ہو گیا۔

محکمہ موسمیات کی جانب سے کہا گیا تھا کہ پہاڑی علاقے میں سفر کرنے والے احتیاطی تدابیر اختیار کریں جبکہ تفریح کے لیے جانے والے پہاڑی وادیوں اور گھاٹیوں میں قیام سے گریز کریں۔

تیز ہواؤں کی وجہ سے بجلی کے کھمبے اکھڑ گئے جس سے متعدد گھروں میں بجلی کی فراہمی متاثر ہوئی۔

واضح رہے کہ محکمہ شہری دفاع کی جانب سے کہا گیا ہے کہ ان دنوں موسم شدید غبار آلود رہنے کا امکان ہے جس کے پیش نظر ہائی وے پر سفر کرنے والے خصوصی احتیاطی تدابیر اختیار کریں۔