چین، ایران اورجنوبی کوریا سمیت کئی ایشیائی اور یورپی ممالک کے بعد کورونا وائرس خلیجی ممالک میں   بھی پہنچ گیا ۔

غیر ملکی خبر رساں ادارے کے مطابق  کویت ،بحرین ، افغانستان   کے بعد عراق میں میں بھی کورونا وائرس کے پہلے کیس کی تصدیق ہوگئی ہے۔

نجف شہر میں محکمہ صحت کے سربراہ نے بتایا کہ ایک ایرانی طالب علم  میں کورونا وائرس  کی تصدیق ہوئی ہے۔ طالب علم کو فوری طور پر  اسپتال منتقل کردیا گیا ہےاور وائرس سے بچاؤ کے لیے تمام ضروری  اقدامات کیے جارہے ہیں۔

یاد رہے کہ عراق نے گذشتہ کئی دنوں سے ایران سے آمدورفت معطل کر رکھی ہے۔

دوسری جانب ایران  کے صوبہ قم میں کورونا وائرس سے ہلاکتوں کی تعداد 50 ہوگئی ہے۔

قم سے تعلق رکھنے والے ایرانی رکن پارلیمنٹ نے حکومت پر الزام لگایا کہ وہ ہلاکتوں کی اصل تعداد چھپارہی ہے اور قم میں بڑی تعداد میں لوگ اس وائرس سے ہلاک ہوگئے ہیں۔

ایران کی نیم سرکاری نیوز ایجنسی ایلنا  نے قم کے ایک سرکاری اہلکار  کے حوالے سے بتایا ہے کہ  شہر میں 250 افراد کو قرنطینہ میں رکھا گیا ہے جبکہ ملک بھر میں دو روز سے اسکول بند ہیں۔

اہلکار کا مزید کہنا ہے کہ ایران میں کورونا وائرس سے ہلاکتیں 13 فروری سے شروع ہوگئی تھیں تاہم سرکاری سطح پر  19 فروری کو پہلے کیس کی تصدیق کی گئی ۔

ایرانی وزارت صحت کا  موقف ہے کہ کورونا وائرس سے ہلاکتوں کی تعداد 12 جبکہ متاثرہ افراد کی تعداد 47 ہے۔

ایران میں کورونا وائرس کی وجہ سے پاکستان کے ساتھ ساتھ ترکی اور آرمینیا نے بھی ایران کے ساتھ اپنی سرحد بند کردی ہے۔