برطانیہ میں آئے سمندری طوفان کیارہ کے باعث برٹش ائیرویز کی نیویارک سے لندن پرواز نے تیز ترین پرواز کا ریکارڈ بنالیا۔

غیرملکی خبررساں ادارے کے مطابق برطانوی ائیرلائنز کی نیویارک سے لندن آنے والی پرواز نے تیز ترین پرواز کا ریکارڈ بنالیا ہے۔

برٹش ائیرویز کی بوئنگ 747 کی نیویارک سے آنے والی پرواز وقت سے سوا گھنٹہ پہلے ہی لندن کے ہیتھرو ائیرپورٹ پر پہنچی جس نے سب کو حیرت میں ڈال دیا ہے۔

رپورٹ کے مطابق طوفانی ہواؤں کے جھکڑ سے گزرنے کے لیے طیارے کا پائلٹ جہاز کی رفتار کو 825 میل فی گھنٹہ (1327 کلومیٹر فی گھنٹہ) پر لے گیا جس کے باعث یہ پرواز مقررہ وقت سے قبل ہی لندن کے ہیتھرو ائیرپورٹ پر پہنچ گئی۔

Advertisement

Thanks to a strong, well-positioned jet stream, a @British_Airways 747 managed a new New York-London subsonic speed record today, making the journey in 4 hours 56 minutes—17 minutes faster than the previous record. https://t.co/HISXpN6Vns #BA112 pic.twitter.com/A2R42rsx14

— Flightradar24 (@flightradar24) February 9, 2020

برطانیہ اِس وقت سمندری طوفان کیارہ کی زد میں ہے جس کے باعث نظام زندگی درہم برہم ہوگیا ہے۔

طوفان کے باعث برطانیہ میں شدید ہواؤں کے جھکڑ چل رہے ہیں جس کے نتیجے میں کئی مقامات پر درخت گرگئے ہیں جس سے کافی مالی نقصان ہوا ہے لیکن وہیں یہ جھکڑ برٹش ائیرویز کے لیے تیز ترین پرواز کا ذریعہ بن گئے ہیں۔

ایوی ایشن ماہرین کے مطابق نیویارک سے لندن پہنچنے والی پرواز کا دورانیہ 6 گھنٹے 13 منٹ ہے لیکن یہ پرواز 4 گھنٹے 56 منٹ پر منزل پر پہنچی یوں اس پرواز نے سوا گھنٹہ قبل ہی منزل پر لینڈ کیا۔

ایوی ایشن ماہرین نے برٹش ائیرویز کی پرواز کو غیر معمولی قرار دیا ہے جبکہ ائیرویز حکام کا کہنا ہے کہ رفتار کے حوالے سے حفاظتی اقدامات ہمیشہ ہماری ترجیح رہے ہیں۔

فلائٹ ریڈار 24 کے مطابق اس سے قبل ایک نارویجین فلائٹ نے 5 گھنٹے 13 منٹ میں نیویارک سے لندن پہنچ کر عالمی ریکارڈ بنایا تھا۔