امریکہ اور طالبان کے درمیان امن معاہدے کے باوجود  افغانستان کو سیاسی بحران کا سامنا ہے اور افغان عوام غیر یقینی صورتحال کا شکار ہے۔

تفصیلات کے مطابق افغان صدر اشرف غنی نے دوسری مدت کے لئے صدر کے عہدہ کا حلف اٹھالیا لیکن ان کے حریف عبد اللہ عبداللہ نے ان کی تقریب حلف برداری  کو ماننے سے انکار کردیا۔

امریکی نمائندے زلمے خلیل  زاداور نیٹو امریکی فورسز کے کمانڈر جنرل اسکاٹ ملر نے  اشرف غنی کی تقریب میں شرکت کی۔

افغانستان کے چیف ایگزیکٹو عبد اللہ عبداللہ  نے  خود ہی اپنی صدارتی تقریب حلف برداری منعقد کرلی ۔ اشرف غنی نے ایوان صدر میں  اور عبداللہ عبداللہ نے سپیدار محل میں حلف اُٹھایا۔

ملک میں بیک وقت دو صدور کی حلف برداری سے  ایک نیا سیاسی بحران کھڑا ہوگیا ۔

نومنتخب افغان صدر کی تقریب حلف برداری کے دوران دو  دھماکوں کی آوازیں  بھی سنائی دیں،  جس پر انہوں نے حاضرین کو اپنا سینہ دکھاتے ہوئے کہا کہ میں نے بلٹ پروف جیکٹ نہیں پہنی کیوں کہ میرا سینہ عوام پر قربان ہونے کے لئے حاضر ہے۔

واضح رہے کہ عبد اللہ عبد اللہ نے صدارتی انتخاب میں دھاندلی کا الزام عائد کرتے ہوئے نتائج ماننے سے انکار کیا تھا اور اپنی جیت کا دعوی کیا تھا۔

ادھر طالبان نے کہا ہے کہ متوازی صدارتی تقریبات امن بات چیت کو خطرے میں ڈال دیں گی۔بین الافغان مذاکرات  کا مقررہ وقت پر شروع ہونا نظر نہیں آرہا۔

دوسری جانب کابل نے رد عمل میں کہا ہے کہ اگر تشدد ترک نہ کیا گیا تو افغان فورسز طالبا ن کے خلاف حملے شروع کریں گی۔