امریکہ نے ایران سے مطالبہ کیا ہے کہ وہ اپنی حراست میں موجود تمام امریکی قیدیوں کو فوری طور پر رہا کرے۔

عرب میڈیا کے مطابق امریکی سیکرٹری خارجہ مائیک پومپیو  نے  اپنے حالیہ بیان میں ایران سے مطالبہ کیا ہے کہ وہ اپنی حراست میں موجود تمام امریکی قیدیوں کو فوری طور پر رہا کرے۔

امریکی سیکرٹری خارجہ نے کہا کہ ایرانی جیلوں میں  کورونا وائرس کے پھیلاؤ سے متعلق رپورٹس تشویش کا باعث ہیں۔امریکہ اپنے کسی بھی شہری کی وفات کا براہ راست ذمے دار ایرانی حکومت کو ٹھہرائے گا  اور اس پر ہمارا جواب بھرپور ہو گا۔

مائیک پومپیو  کا کہنا تھا کہ ایران نے امریکی شہریوں کو بنا کسی سبب یا جواز کے ظالمانہ طور پر جیلوں میں  قید رکھا ہوا ہے۔

امریکہ کی وزارت خارجہ نے زور دیا ہے کہ وہ بیرون ملک ظالمانہ طور پر حراست میں موجود تمام امریکی شہریوں کی واپسی  تک اطمینان سے نہیں بیٹھے گی۔

کورونا وائرس کے خدشات، ایران نے 70 ہزار قیدی رہا کردیے

واضح رہے کہ  ایرانی حکومت نے حالیہ عرصے میں کورونا وائرس کے سبب 70 ہزار قیدیوں کو رہا کیا ہے۔

ایران میں کورونا وائرس کے مریضوں کی تعداد 9 ہزار تک پہنچ گئی ہے جبکہ اب تک 354 افراد ہلاک ہوچکے ہیں۔اس کے علاوہ 3  ہزار کے قریب مریض صحت یاب بھی ہوئے ہیں۔

ایران میں کورونا وائرس کے پھیلاؤ کے سبب نماز جمعہ کے اجتماعات پر بھی پابندی عائد ہے۔

امریکہ میں کرونا وائرس سے پہلی ہلاکت کی تصدیق

دوسری جانب  ترجمان ایرانی وزارتِ خارجہ عباس موسوی  نے کہا ہے کہ کورونا وائرس کسی خاص قوم اور علاقہ سے مخصوص نہیں بلکہ یہ وائرس ایک عالمی چیلنج بن چکا ہے۔

ترجمان ایرانی وزارتِ خارجہ  نے کہا کہ مہلک وائرس کا تعلق کسی خاص قوم اور خطے سے نہیں ہے اس کا مقابلہ باہمی تعاون کے ساتھ  ہی کیا جاسکتا ہے۔

عباس موسوی نے مزید کہا کہ دنیا کو گذشتہ تین سال سے امریکی جھوٹ، نفرت اور تشدد جیسے خطرناک جراثیم کا سامنا ہے۔