آزادی صحافت کے دن کی مناسبت سے سیکرٹری جنرل اقوام متحدہ انتونیو گوتریس نے اپنے بیان میں کہا ہے کہ صحافی اورمیڈیاورکرز لوگوں تک ہمارا پیغام پہنچانے میں اہم مددگار ہیں۔

ان کا کہنا تھا کہ وباکےاس دورمیں یہ پیغامات انتہائی اہم ثابت ہوسکتے ہیں اس لئے دنیا بھر کی حکومتیں آزادی صحافت کا تحفظ یقینی بنائیں۔

سیکرٹری جنرل اقوام متحدہ کا کہنا تھا کہ تمام حکومتیں صحافیوں کو ان کے فرائض انجام دینے کے لئے ان کی مدد کریں  اور وبا کے دوران اور اس کے بعد بھی صحافتی ذے داریاں پوراکرنے میں صحافیوں کی مدد کی جائے ۔

انتونیو گوتریس کا کہنا تھا کہ وبا کیساتھ ہی غلط اطلاعات، معلومات اور افواہوں کا سلسلہ بھی شروع ہوا ہے اور میڈیا ہی سے غلط معلومات کی روک تھام، اس کا سدباب اور مستند اطلاعات کی ترسیل ممکن ہوتی ہے ۔

کراچی سمیت ملک بھر میں لاک ڈاؤن کی صورتحال

انہوں نے بتایا کہ نقل و حرکت کا عارضی روک تھام کورونا کو شکست دینے کے لئے انتہائی اہم ہے۔

سیکرٹری جنرل اقوام متحدہ نے کہا ہے کہ حقائق، درست معلومات اور سچائی کا پرچار کرنے پرمیڈیا کے شکرگزار ہیں اور تمام حکومتیں امن وانصاف اور انسانی حقوق کیلئے آزادی صحافت کو یقینی بنائیں۔

پاکستان سمیت دنیا بھر میں آج آزادی صحافت کا دن منایا جا رہا ہے۔

 اس دن کو منانے کا مقصد عالمی سطح پرصحافتی آزادی کی اہمیت کو اجاگر کرنے کے ساتھ ساتھ ایسے اقدامات کا حصول بھی ہے جس میں آزادی صحافت میں پیش آنے والی مشکلات اور رکاوٹوں کا سدباب بھی کیا جا سکے۔

  اقوام متحدہ نے 3 مئی 1993 ء کو باقاعدہ طور پر آزادی صحافت کا عالمی دن منانے کااعلان کیا اس دن تمام دنیا کی صحافتی برادری اس بات کا تجدید عہد کرتی ہے کہ کسی بھی پرتشدد عناصر یا ریاستی دباؤ کے بغیر آزاد سچی اور ذمہ دارانہ اطلاعات عوام تک پہنچنے کیلئے لڑتے رہیں گے ۔

دنیا بھر میں آزادی صحافت کیلئے صحافیوں کی قربانیاں لازوال ہیں۔

پاکستان کا جائزہ لیا جائے تو یہاں بھی صحافی ایک طویل عرصے سے اپنی آزادی کیلئے قربانیاں دے رہے ہیں انکی قربانیوں کی ایک ناقابل فراموش تاریخ ہے ۔