چین کی جانب سے امریکی  وزیر خارجہ مائیک پومپیو کے  کورونا وائرس کے پھلاؤ سے متعلق الزامات مسترد کردیئے گئے ہیں۔

 چینی حکام کا کہنا ہے کہ مائیک پومپیو کے پاس ووہان لیبارٹری کے بارے میں اپنے دعوے کے متعلق ان کے پاس کوئی ثبوت نہیں۔

چینی وزارت خارجہ کی ترجمان ھوا شونیینگ نے ایک بیان میں کہا کہ امریکی وزیر خارجہ مائیک پومپیو یہ دعویٰ کرچکے ہیں کہ کورونا وائرس ووہان شہر میں قائم لیبارٹری سے پھیلا مگر وہ اپنے اس دعوے کا کوئی ٹھوس ثبوت اب تک پیش نہیں کرسکے۔

انہوں نے کہا کہ امریکی وزیر خارجہ کوئی ثبوت اس لئے پیش نہیں کرسکتے کیونکہ اس کے لیے ان کے پاس کوئی ثبوت نہیں ہے۔

چینی وزارت خارجہ کی ترجمان کا کہنا تھا کہ ہمیں کرونا کے پھیلائو کے مقام اور اس کے اسباب سیاسی رنگ دینے کے بجائے ماہرین اور سائنسدانوں پر چھوڑ دینا چاہیے۔ سیاست دان اپنی داخلی سیاسی ضروریات اور مفادات کی وجہ جھوٹ بولتے ہیں مگر سچ بات سائنسدان بتائیں گے کہ آیا یہ وائرس کیسے اور کہاں سے پھیلا۔

گٹر کے پانی سے سبزیاں اگانے والوں کیخلاف کارروائی کا حکم

یاد رہے کہ اس سے  قبل ڈاکٹر انتھونی فاؤچی نے بھی امریکی صدر کے  وائرس سے متعلق الزامات کے دعوے کو  مسترد کردیا تھا اور سیکرٹری خارجہ پومپیو  کے چین کے خلاف بلا ثبوت الزامات کی بھی نفی کردی تھی۔

امریکی کورونا ٹاسک فورس کے رکن ڈاکٹر فاؤچی کہتے ہیں کہ چین کی ووہان لیب سے وائرس پھیلنے کا کوئی سائنسی  ثبوت موجود نہیں ملا ہے، کورونا  چمگادڑ سے پھیلا  اور اس نے وقت کے ساتھ اپنی صورت کو تبدیل کیا لیکن وائرس انسانی ساختہ نہیں ہے۔

امریکی حساس ادارے اور فوجی جنرل نے بھی ٹرمپ انتظامیہ کے دعووں  کی نفی کردی ہے۔

ڈاکٹر انتھونی فاؤچی نے وائلڈ میگزین کو کو انٹرویو میں بتایا کہ  کوویڈ نائنٹین  ایک جانورمیں پہلی بار پیدا ہوا  اور پھر انسانوں کو منتقل ہوا، کورونا وائرس چمگادڑ کے جسم میں کافی عرصے تک رہا اور اپنی ارتقائی عمل سے گزر کی موجودہ صورت اختیار کر گیا۔

انہوں نے کہا کہ  یہ  وائرس مصنوعی نہیں ہوسکتا  ہے اور اس کی جنیات میں بھی کسی انسان نے  کوئی چھیڑ چھاڑ نہیں کی  ہے۔

اس سے قبل امریکی صدر ٹرمپ اور سیکرٹری خارجہ پومپیو دعوے کر چکے ہیں کہ چین کی ووہان لیب کورونا وائرس کو پھیلانے کی ذمے دار ہے جبکہ ان دونوں کےدعوے کو خود امریکی حساس ادارے بھی رد کرچکے ہیں ۔

اعلیٰ امریکی فوجی جنرل جوائنٹ چیفس  چیئرمین جنرل مارک ملر نے بھی کہہ دیا کہ ووہان سے وائرس پھیلنے کے حوالے سے ہمارے پاس کوئی علم نہیں ہے۔