سعودی حکومت نے کورونا وائرس کے پیش نظر رواں سال حج منسوخ کرنے پرغور شروع کردیا ہے۔

تفصیلات کے مطابق دنیا بھر میں تیزی سے پھیلتے کورونا وائرس کے باعث سعودی  عرب کے حکام نے 1932 میں سلطنت کے قیام کے بعد پہلی بار رواں سال حج منسوخ کرنے پر سنجیدگی سے غور شروع کر دیا ہے۔

سعودی وزارت حج و عمرہ کے سینئر عہدیدار  نے کہا کہ ملک میں کورونا وائرس کے کیسز ایک لاکھ سے زائد ہونے کے بعد حکام رواں سال حج کے حوالے سے انتہائی سنجیدگی اور باریک بینی سے جائزہ لے رہے ہیں تاہم ایک ہفتے کے اندر فیصلہ کرلیا جائے گا۔

یاد رہے اس سے قبل سعودی حکومت نے کورونا وائرس وبا کی وجہ سے رواں برس حاجیوں کی تعداد کو نہایت مختصر ترین رکھنے کی تجویز بھی سامنے آئی تھی۔

دوسری جانب فرانسیسی خبر رساں ادارے کے مطابق ملائیشیا کے وزیر مذہبی امور ذولقفلی محمد البقری نے تصدیق کی کہ اس سال کوئی بھی ملائیشیائی شہری حج ادا نہیں کرسکے گا۔

کوروناوائرس ،انڈونیشیا نے رواں سال حج پروگرام منسوخ کردیا

وزیر مذہبی امور کے مطابق کورونا کی وبا کے باعث 31 ہزار 600 عازمین کی حفاظت کے لیے رواں سال حکومت نے حج منصوبے کو منسوخ کیا ہے اور انہیں امید ہے کہ عازمین حکومتی فیصلے کو قدر کی نگاہ سے دیکھیں گے۔

دنیا بھر کے اسلامی ممالک سے ہر سال 20 لاکھ سے زائد عازمین فریضہ حج کی ادائیگی کے لیے سعودی عرب کے مقدس مقامات کی جانب سفر کرتے ہیں جبکہ  ملائیشیا سے 30 سے 31 ہزار عازمین فریضہ حج کے لیے سعودی عرب جاتے ہیں۔

 واضح رہے کہ اس سے قبل رواں ماہ کے آغاز میں انڈونیشیا کی حکومت نے بھی کورونا کے باعث حج منصوبہ منسوخ کیا تھا ۔