سعودی حکومت کی جانب سے غیر قانونی طور پر عازمین حج کو مکہ لے جانے پر 50 ہزار ریال کا جرمانہ عائد کردیا گیا ہے۔

غیر قانونی عازمین حج کو مکہ لے جانے پر 50 ہزار ریال تک جرمانہ کی سزا کا اعلان کرتے ہوئے کہا ہے کہ خلاف ورزی کرنے والا اگر غیر ملکی ہے تو سعودی عرب سے بے دخل کردیا جائے گا۔

سعودی محکمہ پاسپورٹ نے کہا ہے کہ حج اجازت نامہ حاصل نہ کرنے والے عازمین کو ٹرانسپورٹ کی سہولت فراہم کرنے پر 50 ہزار ریال تک جرمانہ اور 6 ماہ تک قید کی سزا ہوگی۔

دوسری طرف حج مقامات میں محکمہ پاسپورٹ کے سربراہ جنرل خالد بن فہاد الجعید نے کہا ہے کہ مکہ کے داخلہ راستوں پر چوکیاں قائم کر دی گئی ہیں۔

محکمہ پاسپورٹ کی مرکزی چوکیاں شمیسی، البہیتہ، تنعیم اور الکر میں قائم ہیں جہاں شہر مقدس داخل ہونے والوں کو چیک کیا جاتا ہے اس لئے غیر قانونی عازمین کو مکہ مکرمہ لے جانے کی خلاف ورزی پر سزاؤں کا انطباق مرحلہ وار ہوگا۔

پہلے مرحلے میں 15 دن قید اور 10 ہزار جرمانہ ہوگا۔‘ٹرانسپورٹ کی سہولت فراہم کرنے والا اگر غیر ملکی ہوگا تو وہ سعودی عرب سے بے دخل کردیا جائے گا نیز گاڑی ضبط کی جائے گی۔

دوسری دفعہ خلاف ورزی پر دو ماہ قید اور ہر غیر قانونی عازم کے حساب سے 25 ہزار ریال جرمانے کی سزا ہوگی جبکہ تیسری مرتبہ خلاف ورزی کی گئی تو 6 ماہ قید اور ہر غیر قانونی عازم کے حساب سے 50 ہزار ریال جرمانہ کی سزا دی جائے گی۔