پاکستانی پائلٹس  کے مشتبہ لائسنسز کا معاملہ، ملائیشین  سول ایوی ایشن اتھارٹی نے ملک میں کام کرنے والے پاکستانی  پائلٹس کی تفصیلات طلب  کرلیں۔

تفصیلات کے مطابق پاکستانی پائلٹس کے مشتبہ لائسنس کے معاملے پر ملائیشین سول ایوی ایشن اتھارٹی  بھی حرکت میں آگئی۔ملائیشیا میں ملازمت کرنے والے تمام پاکستانی پائلٹس کی تفصیلات کرلی گئیں۔

ملیشین سول ایوی ایشن کے  ڈپٹی ڈائریکٹر فلائٹ آپریشن ڈویژن  کی جانب سے جاری کیے گئے خط میں مقامی گیارہ اداروں میں تعینات پاکستانی  پائلٹس کی مکمل تفصیلات طلب کی گئی ہیں۔

 تفصیلات میں پائلٹ کا نام، پاسپورٹ نمبر اور پاکستانی لائسنس نمبر طلب کیے گئے ہیں۔ اگر ملائشین سی اے اے کا جاری کردہ اجازت نامہ موجود ہے تو وہ بھی فراہم کیا جائے۔

خط میں پاکستانی سی اے اے کے جاری لائسنسز کے تحت ملائشین لائسنسز پر منتقلی کی تفصیلات بھی طلب کی گئی ہیں۔

ملائشین سول ایوی ایشن کے فلائٹ آپریشن ڈویژن نے بذریعہ ای میل تفصیلات طلب کی  ہیں۔پاکستانی سول ایوی ایشن کو کل تک درکار تفصیلات کی فراہمی کا کہا گیا ہے۔

ملائیشین سول ایوی ایشن نے مطالبہ کیا ہے کہ پاکستانی پائلٹس کی لائسنس کی دوبارہ تصدیق تک کے مراحل کی تفصیلات فوری فرایم کی جائیں۔

ملائیشین سی اے اے نے کہا ہے کہ پاکستانی سی اے اے کی جانب سے تصدیق نہ کیے جانے پر پاکستانی پائلٹس کو جاری کردہ ملائیشین لائسنسز منسوخ کر نے کے علاوہ کو ئی آپشن نہیں ہو گا۔