بالی وڈ اداکار سشانت سنگھ کے بعد ایک اور بھارتی ٹی وی اداکار سشیل گوڑا نے مبینہ طور پر خودکشی کرلی ہے۔

تفصیلات کے مطابق بتیس سالہ ٹی وی اداکار اپنے آبائی شہر منڈیا میں فارم ہاؤس میں مردہ حالت میں پائے گئے۔

سشیل گوڑا کی موت کی وجہ تاحال سامنے نہیں آسکی تاہم پولیس نے مقدمہ درج کر کے تحقیقات کا آغاز کر دیا ہے۔

پولیس کا کہنا ہے کہ  شک ہے سشیل نے خود کشی اس وجہ سے کی ہو کہ جب سے لاک ڈاؤن شروع ہوا ہے ان کے پاس کرنے کے لیے کوئی کام نہیں تھا جبکہ سشیل گوڑا کی فلم کچھ عرصے میں ریلیز ہونے والی ہے ۔

پولیس کا مزید کہنا ہے کہ اداکار سشیل گوڑا  اداکار ہونے کے ساتھ ساتھ فٹنس ٹرینر بھی تھے اور انہوں نے ڈرامہ سیریل انت پورہ میں بھی کام کیا تھا۔

یاد رہے کہ گزشتہ روز 34 سالہ اداکار سشانت سنگھ راجپوت نے خودکشی کرلی تھی۔

سشانت کی موت کے حوالے سے ان کے دوستوں کا کہنا تھا کہ سشانت سنگھ 14 جون کی صبح 10 بجے نیند سے اٹھے اور جوس بناکر پیا اور پھر واپس اپنے کمرے میں چلے گئے اور دروازہ بند کرلیا۔

سوشانت سنگھ کی موت میں سلمان خان کا ہاتھ؟

اداکار کے دوستوں نے یہ بھی بتایا کہ اداکار نیند سے جاگنے کے بعد سے خاموش خاموش تھے۔

دوسری جانب اداکار نے ’رابطہ‘ اور ’کیدرناتھ‘، ’پی کے‘، ’ایم ایس دھونی‘، جیسی مشہور فلموں میں اپنی صلاحیتوں کے جوہر دکھائے۔

واضح رہے کہ بھارتی اداکار کی موت ایسے وقت میں ہوئی جب ایک ہفتے قبل سشانت کے سابق مینیجر دِشا سیلیان نے ممبئی میں ہی 14 منزلہ عمارت سے کود کر خودکشی کی تھی۔