کامیاب حج کے انعقاد کے بعد سعودی عرب نے عمرے پر عائد پابندی ہٹانے سے متعلق غور کرنا شروع کردیا ہے۔

عرب میڈیا کے مطابق کورونا کے باعث رواں برس فروری میں سعودی عرب نے بیرون ممالک سے عمرے کیلئے آنے والے افراد کے ملک میں داخل ہونے پر پابندی عائد کردی تھی، بعد ازاں سعودی حکومت نے مارچ کے آغاز میں تمام بیرونی و اندرونی زائرین پر عمرے کی پابندی کا اعلان کردیا تھا جبکہ سعودی حکومت نے مارچ میں عمرے پر پابندی عائد کرتے ہوئے تمام مساجد اور دیگر مقدس مقامات کو بھی بند کردیا تھا۔

سعودی عرب میں ماہ رمضان المبارک میں کچھ نرمیاں کرکے مساجد کو محدود نمازیوں کیلئے کھول دیا تھا۔

تفصیلات کے مطابق کورونا کے کیسز میں کمی کے باوجود سعودی حکومت نے حفاظتی اقدامات کے تحت رواں سال فریضہ حج کو بھی بیماری کے باعث محدود رکھا تھا اور کسی بھی دوسرے ملک سے عازمین کو آنے کی اجازت نہیں دی تھی۔

حج کے بعد کسی بھی شخص میں کورونا کی تصدیق نہ ہونے کی وجہ سے اب سعودی عرب عمرے کی محدود اجازت دینے پر غور کر رہی ہے۔

سعودی حکام نے عمرے پر عائد پابندی ہٹانے پر غور کرنا شروع کردیا ہے۔

وزارت حج اور عمرہ نے کامیاب حج کے انعقاد کے بعد اشارہ دیا ہے کہ آنے والے چند ہفتوں میں عمرے پر عائد پابندی ہٹالی جائے گی لیکن ابھی یہ واضح نہیں ہے کہ حکومت کب تک عمرے سے پابندی ہٹانے کا ارادہ رکھتی ہے۔