امریکی صدر جوبائیڈن نے کہا ہے کہ امریکہ کورونا وباء کے باعث پیدا ہونے والے بحران سے نکلنے کے قریب سے جو کہ اس بات کا ثبوت ہے کہ امریکہ ایک بار پھر سے آگے بڑھ رہا ہے۔

تفصیلات کے مطابق امریکی صدر جوبائیڈن نے کانگریس اجلاس میں اپنا پہلا خطاب کرتے ہوئے کہا ہے کہ امریکہ میں کورونا بحران سے نمٹنے کے لئے ریسکیو آپریشن کا آغاز کیا گیا تھا جس کے مثبت نتائج آنا شروع ہوگئے ہیں۔

امریکی صدر کا کہنا تھا کہ امریکی حکومت کی جانب سے ریسکیو آپریشن کے تحت 160 ملین چیک کی تقسیم کو یقینی بنایا گیا ہے لیکن ہماری پہلی ترجیح لوگوں کو روزگار دینا ہے۔

امریکی صدر نے بتایا کہ انھیں کورونا بحران ورثے میں ملا تھا لیکن اب امریکہ ایک بار پھر سے قیادت کے لئے تیار ہے کیونکہ ہم رکنے والے نہیں ہیں اور اپنی کاوشوں سے امریکہ کو عظیم تر بنائیں گے۔

جوبائیڈن نے بتایا ہے کہ کسی بھی امریکی صدر نے پہلے سو دن میں اتنی نوکریاں نہیں دیں جتنی اس دور میں عوام کو فراہم کی جا رہی ہیں۔

ان کا کہنا تھا کہ امریکی ملازمتوں کا پروگرام ملک کی تعمیر نو کا پلان ہے اور ہمارا عزم ہے کہ بہتر تعلیم تک سب کی رسائی ہونی چاہیئے۔

امریکی صدر کا کہنا تھا کہ امریکہ میں کورونا ویکسین 16 سال سے زیادہ عمر کے ہر فرد کے لئے موجود ہے اور عوام سے درخواست سے کہ کورونا ویکسین لگوائی جائے۔