کالعدم دہشتگرد تنظیم داعش کے مقتول بانی ابو بکر البغدادی کے نائب اور داعش کے مالیاتی امور سنبھالنے والے سامی جاسم محمد جعاطہ العجوز الجبور المعروف حاجی حامد نے عراق میں گرفتاری کے بعد دوران تفیش کئی اہم رازوں سے پردہ اٹھا دیا ہے۔ جن میں داعش کے مالیاتی ذرائع اور طریقوں کے بارے میں اعترافات بھی شامل ہیں۔

آر ٹی عریبیہ نے عراقی اخبار “القضا” میں شائع رپورٹ کے حوالے سے بتایا کہ عراقی سیکیورٹی فورسز نے سامی جاسم سے تفتیش کی جس میں جاسم نے بتایا کہ سنہ 2014ء کے دوران داعش نے تین سال تک کیسے لوگوں سے ٹیکسوں کی آڑ میں بھتہ وصول کیا۔

حاجی حامد نے دوران تفتیش داعش کے پیسے کے انتظام کے طریقہ کار اور اقتصادی تنظیم کے وسائل کے بارے میں بتایا کہ کس طرح اس کے بیت المال کا انتظام سنھبالنے کے بعد  تنظیم اپنے مالی وسائل حاصل کرتی تھی۔

حاجی حامد نے انکشاف کیا کہ داعش کس طرح موت کے ڈر سے نینویٰ میں تاجر اور امیر لوگوں سے پانچ لاکھ ڈالر ماہانہ وصول کیا جاتا تھا۔

سامی جاسم نے یہ بھی بتایا کہ کس طرح تنظیم کی دیوان الرکاز (تیل کی اسمگلنگ) میں کام کے دو سال کے دوران ایک چوتھائی بلین ڈالر سے زیادہ کی درآمدات ہوئیں۔ جس سے حاصل رقم کو سالانہ کی بنیاد پر داعش کے بیت المال میں جمع کیا جاتا تھا۔

حامد کے اعترافات کے مطابق تنظیم کے بجٹ میں 2016 میں اقتدار سنبھالنے کے بعد 250 ملین ڈالر اور 3 ٹن سونا تھا، جو بیت المال کے متعدد ملازمین کی کمان میں گھروں اور سرنگوں میں ذخیرہ کیا گیا تھا۔ ان میں زیادہ تر تیل کی برآمدات سے اور داعش کی نام نہاد خود ساختہ ریاست کی سرحدوں سے باہر کی جانے والی لوٹ مار، رائلٹیز، تاجروں کو تاوان کے لیے اغوا اور دیگر ذرائع سے حاصل کی جاتی تھی جسے مالِ غنیمت کہا جاتا تھا۔

حاجی حامد نے انکشاف کیا کہ عراقی تیل، فیکٹریوں اور چھوٹی ریفائنریوں کے انفرادی مالکان کو فروخت کیا جا رہا تھا، جب کہ کچھ حصہ بیرون ملک اسمگل کیا جاتا تھا۔ دوسرا حصہ بلیک مارکیٹ میں شام کے زیر کنٹرول زمینوں کے اندر بندرگاہ کے ذریعے 180 فی ٹن کے حساب سے فروخت کیا جاتا تھا۔

حاجی حامد 2014 کے موسم گرما میں البغدادی کے قریب تھا۔ اس وقت داعش نے وسطی اور مغربی عراقی صوبوں پراپنے اسٹریٹجک حملے شروع کیے۔

حامد نے اعتراف کیا کہ تنظیم کے سربراہ نے کمانڈروں کو ہدایت کی کہ وہ ریاستی اداروں، امیروں کے گھروں، ہتھیاروں کی دکانوں، فوجی سازوسامان اور کمپنی کے فرنیچر پر حملے کریں اور سامان قبضے میں لیں۔

اس نے بتایا کہ ISIS نے اپنے زیر قبضہ گورنریوں کی جیلوں میں ہزاروں قیدیوں کو رہا کیا۔ اس کے بدلے میں سیکیورٹی سروسز کے افسران اور ارکان کے نام حاصل کیے۔ ان کا تعاقب کیا اور انہیں ختم کیا۔

تفتیش کے دوران قابل ذکر انکشاف یہ ہوا کہ عراقی شہری الجبوری نے داعش کے اندر کئی ذمہ داریاں سنبھالی تھیں جن میں بیت المال، آئل ڈیریویٹوز آفیسر، رقوم کی تقسیم اور بمبار ڈرون طیاروں کے امور بھی شامل تھے۔