افغان طالبان اور امریکا کے درمیان مزاکرات آج قطر کے دارالحکومت دوحہ میں ہوں گے۔

غیر ملکی خبر رساں ادارے کے مطابق افغان طالبان اور امریکی وفود آج ہفتے کے روز قطر کے دارالحکومت دوحہ میں ملاقات کریں گے، افغان طالبان کے وفد کی قیادت قائم مقام وزیر خارجہ امیر خان متقی کریں گے جبکہ یہ وفد دوحہ کے دورے کے دوران یورپی یونین کے نمائندوں سے بھی ملاقات کرے گا۔

رپورٹ کے مطابق امارات اسلامیہ کے وزارت خارجہ کے ترجمان عبدالقہار بلخی کا کہنا ہے کہ یہ وفد تعلیم، صحت، مالیات، سیکیورٹی اور افغان بینک کی وزارتوں کے نمائندوں پر مشتمل ہے۔

اس ملاقات پر پاکستان نے دونوں فریقوں کے درمیان مزاکرات کی بحالی کی تعریف کرتے ہوئے عالمی برادری پر زور دیا ہے کہ وہ موجودہ افغان حکومت کے ساتھ بات چیت کریں۔

پاکستان کے وزیر خارجہ شاہ محمود قریشی کا کہنا ہے کہ افغانستان میں انسانی بحران اور معاشی تباہی کے باقی دنیا پر برے نتائج مرتب ہوں گے لہذا بین الاقوامی برادری کو بحران سے بچنے کے لیے مثبت انداز میں کردار ادا کرنے کی ضرورت ہے۔

امارت اسلامیہ کے نائب ترجمان احمد اللہ واثق کا کہنا ہے کہ افغان طالبان کا وفد دو روزہ ملاقات میں متعدد امور پر تبادلہ خیال کرے گا۔ افغانوں کے ساتھ تعلقات کا آغاز بامعنی ہونا چاہیے اور اس سلسلے میں جو وعدے کیے گئے ہیں انہیں بھی عملی شکل دینے کی ضرورت ہے۔

دوسری جانب امریکی ایلچی برائے افغانستان تھامس ویسٹ نے خبر رساں ادارے کو انٹرویو دیتے ہوئے امارت اسلامیہ کے وفد کے ساتھ اپنے دورے کی تصدیق کی ہے۔