بھارتی وزیر اعظم نریندر مودی کے دور اقتدار میں مذہبی انتہا پسندی کا ایک اور واقعہ پیش آیا ہے، عسکریت پسندوں نے ایک مسلمان سابق بھارتی وزیر خارجہ کے گھر پر حملہ کیا اور آگ لگا دی۔

مقامی پولیس سربراہ جگدیش چندرا نے اے ایف پی کو بتایا، ” ایک سخت گیر مقامی ہندو گروہ کے تقریباً 20 لوگوں کا ایک ہجوم پیر کو شمالی شہر نینی تال کے قریب خورشید کے گھر کے باہر جمع ہوا، نعرے لگائے، پتھر پھینکے، کئی کھڑکیوں کے شیشے توڑ دیے، توڑ پھوڑ کی اور (ایک دروازے پر) آگ لگا دی،”

ٹائمز آف انڈیا کے مطابق گروہ نے خورشید کے پتلے کو آگ لگائی، گولیاں چلائیں اور ان کی بہو کو بندوق کے زور پر دھمکایا۔

خیال رہے کہ حزب اختلاف کی مرکزی جماعت کانگریس سے تعلق رکھنے والے سلمان خورشید نے گزشتہ ماہ ایک کتاب شائع کی جس میں انہوں نے مودی کے دور میں پروان چڑھنے والی ہندو قوم پرستی کا داعش جیسے انتہا پسند گروہوں سے موازنہ کیا۔

خورشید، جنہوں نے 2012-14 تک وزیر خارجہ کے طور پر کام کیا، واقعے کے وقت اپنے خاندان کے ساتھ گھر سے باہر تھے لیکن انہوں نے سوشل میڈیا پر حملے کے بعد کی تصاویر پوسٹ کیں۔

کانگریس کے ایک ممتاز قانون ساز، ششی تھرور نے کہا کہ خورشید کے گھر پر حملہ “شرمناک” تھا۔

تھرور نے ٹویٹر پر کہا کہ خورشید “ایک سیاست دان ہیں جنہوں نے ہمیشہ ملک کے بارے میں ایک اعتدال پسند، مرکزیت پسند، جامع نظریہ پیش کیا ہے۔ ہماری سیاست میں عدم برداشت کی بڑھتی ہوئی سطح کی اقتدار میں رہنے والوں کو مذمت کرنی چاہیے۔”

This is disgraceful. @salman7khurshid is a statesman who has done India proud in international forums &always articulated a moderate, centrist, inclusive vision of the country domestically. The mounting levels of intolerance in our politics should be denounced by those in power. https://t.co/OQFBoN1Pgw

— Shashi Tharoor (@ShashiTharoor) November 15, 2021

سماجی کارکنان کا کہنا ہے کہ بھارت میں مذہبی اقلیتوں کو 2014 میں مودی کی ہندو قوم پرست جماعت بھارتیہ جنتا پارٹی (بی جے پی) کے اقتدار میں آنے کے بعد سے امتیازی سلوک اور تشدد کی بڑھتی ہوئی سطحوں کا سامنا کرنا پڑا ہے۔

2020 میں، بین الاقوامی مذہبی آزادی پر امریکی کمیشن نے 2004 کے بعد پہلی بار ہندوستان کو “خاص تشویش والے ملک” کے طور پر درج کیا۔

مودی کی حکومت بنیاد پرست “ہندوتوا” (ہندو بالادستی) کے ایجنڈے کو مسترد کرتی ہے اور اس بات پر اصرار کرتی ہے کہ تمام مذاہب کے لوگوں کو مساوی حقوق حاصل ہیں۔