بھارت میں سردخانے میں لایا گیا مردہ شخص رات گزرانے کے بعد زندہ ہوگیا۔

بھارتی ریاست اترپردیش کے ضلع مرادآباد میں 45 سالہ سریش کمار ایک حادثے میں شدید زخمی ہوا جس کے بعد اسے فوری طورپر اسپتال پہنچایا گیا جہاں وہ زخموں کی تاب نہ لاتے ہوئے دم توڑ گیا۔

ڈاکٹرز کی جانب سے زخمی شخص کو مردہ قرار دینے کے بعد اس کی لاش کو پہلے پوسٹ مارٹم کے لیے سرکاری اسپتال پہنچایا گیا جس کے بعد اسے سردخانے منتقل کردیا گیا۔

رپورٹ کے مطابق ڈاکٹرز کی جانب سے مردہ قرار دیئے جانے والا رمیش کمار معجزاتی طور پر 8 گھنٹے سردخانے میں گزارنے کے بعد دوبارہ زندہ ہوگیا۔

میڈیکل سپرٹنڈنٹ راجندرا کمار نے اپنے بیان میں کہا کہ رمیش کمار میں زندگی کے کوئی آثار باقی نہیں تھے اور میں نے خود اس کو مردہ قرار دیا تھا۔

پولیس کی جانب سے دیے گئے بیان میں کہا گیا کہ ڈاکٹرز کی جانب سے مردہ قرار دیے جانے کے بعد ہم نے سریش کمار کی باڈی کو سردخانے منتقل کیا اور ان کے خاندان والوں کو اطلاع دی کہ وہ لاش کو سردخانےسے وصول کرلیں۔

پولیس نے کہا کہ سریش کمار کے اہل خانہ کو سردخانے پہنچنے میں 7 گھنٹے لگ گئے اور لاش وصول کرنے کے لیے کاغذی کارروائی میں ایک گھنٹہ مزید لگ گیا جس کے بعد اہل خانہ کو جب لاش کے پاس لے جایا گیا تو وہ رونے لگ گئے۔

اہل خانہ کے رونے کی آواز سننے کے بعد رمیش کمار کے جسم میں حرکت محسوس ہوئی اور وہ زندہ ہوگیا جس کے بعد اسے دوبارہ سے اسپتال منتقل کرکے علاج شروع کردیا گیا ہے۔

دوسری جانب بھارت کے محکمہ صحت نے واقعے کی تحقیقات بھی شروع کردی ہیں کہ کیسے ڈاکٹرز نے ایک زندہ شخص کو مردہ قرار دے دیا۔