نیو یارک: امریکی صدر جوبائیڈن نے افریقی ممالک سے باضابطہ سفری پابندیاں ہٹانے کا اعلان کیا ہے۔

غیر ملکی خبر رساں ادارے کے مطابق امریکی صدر جوبائیڈن کا کہنا ہے کہ تمام افریقی ممالک سے سفری پابندیاں جمعہ کو ختم ہو جائیں گی، عوام کی صحت کے تحفظ کے لیے سفری پابندیوں میں توسیع کی ضرورت نہیں۔

رپورٹ کے مطابق امریکا نے اس سے قبل بوتسوانا، جنوبی افریقہ، نمیبیا، زمبابوے، لیسوتھو، ایسواٹینی، ملاوی اور موزمبیق پر سفری پابندیاں عائد کی تھیں۔

واضح رہے کہ اس سے قبل وائٹ ہاؤس کی جانب سے افریقی ممالک پر عائد سفری پابندیاں ہٹانے کا اعلان کیا تھا تاہم اب امریکی صدر کی جانب سے بھی باضابطہ طور پر اس کی تصدیق کردی گئی ہے۔

دوسری جانب امریکا اور یورپ میں کورونا وائرس میں تیزی ریکارڈ  کی جارہی ہے جبکہ امریکا میں ساتویں روز 2 لاکھ 54 ہزارسے زائد کیسز رپورٹ کیے گئے ہیں جبکہ ماہرین نے اومیکرون کو سب سے زیادہ پھیلنے والی قسم قرار دیا ہے۔

سی ڈی سی ڈیٹا ٹریکر کے مطابق 27 دسمبر میں 4 لاکھ 41 ہزار 278  کیسز کا اضافہ ہوا، جو کہ روزانہ کیسز کی اب تک کی سب سے زیادہ تعداد ہے۔

امریکی میڈیا کے مطابق انفیکشن میں سات دن کا اوسطً اضافہ جنوری 2021 کے بعد اب اپنی بلند ترین سطح پر ہے تاہم ایجنسی کے عہدیداروں نے امریکہ میں اومیکرون کے پھیلاؤ پر بھی نظرثانی کرتے ہوئے کہا کہ 59 فیصد کیسز اومیکرون قسم کی ہیں۔