ایران نے خبردار کیا ہے کہ اسرائیل نے کسی بھی قسم کی جارحیت کی تو اس کا منہ توڑجواب دیا جائے گا۔

غیر ملکی خبر رساں ادارے  کے مطابق  ایرانی کمانڈرمیجر جنرل غلام  علی راشد نے  اپنے بیان میں کہا  ہے کہ اسرائیل نے حملہ کیا تو اسے بھاری قیمت چکانا پڑے گی۔

انہوں نے کہا ہے کہ  اگر اسرائیل ایران  پر حملہ کرتا ہے تو ہماری مسلح افواج فوری طور پر  جارحیت کے لیے استعمال ہونے والے تمام اڈوں اور راستوں  کو نشانہ بنائیں گی۔

سینئر ایرانی کمانڈر نے مزید کہا کہ اسرائیل امریکی منظوری کے بغیر ایران کے جوہری یا فوجی اڈوں پر حملہ کرنے کی صلاحیت نہیں رکھتا۔

واضح رہے کہ ایران اورعالمی طاقتوں کے درمیان 2015 کے جوہری معاہدے کی بحالی کے  لیے مذاکرات کا دوبارہ آغاز ہوچکا ہے۔

معاہدے پرعمل درآمد کی صورت میں تہران اپنے جوہری پروگرام کومحدود کرے گا جس کے جواب میں امریکا، یورپی یونین اوراقوام متحدہ کی جانب سے ایران پرعائد اقتصادی پابندیوں میں نرمی کی  جائے گی۔

دوسری جانب یہ خبریں بھی زیر گردش تھیں کہ تہران اور عالمی طاقتوں کے درمیان جوہری مذاکرات   میں ناکامی کی صورت میں  اسرائیل فوجی آپشن کی تیاریوں کو تیز کر رہا ہے ۔

اسرائیل کا کہنا ہے کہ وہ ایران  کو جوہری ہتھیار حاصل کرنے سے روکنے کے لیے اس کے خلاف دیگر ممالک کی حمایت کے بغیر تنہا کارروائی کرنے کا حق محفوظ رکھتا ہے ۔