طالبان نے آج اقوام متحدہ سے افغانستان کے مستقل مندوب کی نشست دینے کی اپیل کی ہے۔

اے ایف پی کے مطابق اقوام متحدہ کے نائب ترجمان فرحان حق کا کہنا ہے کہ اُنہیں جمعرات کو موصول ہونے والے خط کے مطابق افغانستان کے نمائندہ خصوصی اسحاق زئی نے 15 دسمبر کو اپنا عہدہ چھوڑ دیا ہے۔

طالبان کی جانب سے اس عہدے کے لیے امیدوار سہیل شاہین کا کہنا ہے کہ یہ نشست اب افغانستان کی نئی حکومت کو دی جانی چاہیے، یہ اقوام متحدہ کی ساکھ کا معاملہ ہے۔ سہیل شاہین نے ٹوئٹر پر کہا کہ افغانستان کی موجودہ حکومت کو ملک پر خود مختاری حاصل ہے۔ واضح رہے کہ ابھی تک کسی بھی ملک نے طالبان حکومت کو تسلیم نہیں کیا ہے۔

اقوام متحدہ کی نشست اور بیرون ملک کچھ سفارتخانے پرانی حکومت کے جلاوطن سفارتکاروں اور افغان طالبان کے درمیان کشمکش کا مرکز بنے ہوئے ہیں۔

طالبان حکومت کے ایک ماہ بعد بھی اسحاق زئی کا اقوام متحدہ کے ہیڈ کوارٹر میں استقبال کیا جا رہا تھا اور انہوں نے نومبر میں سلامتی کونسل کے اجلاس میں طالبان پر کھل کر تنقید کی تھی۔

اس مہینے کے آغاز میں اقوام متحدہ کی جنرل اسمبلی نے حریفوں کے دعوؤں پر فیصلے میں غیر معینہ مدت کے لیے تاخیر کی قرارداد منظور کی تھی۔

طالبان کے پہلے دور حکومت میں ان کی اقوام متحدہ میں کوئی نمائندگی نہیں تھی اور انہیں صرف پاکستان، سعودی عرب اور متحدہ عرب امارات نے تسلیم کیا تھا۔

اقوام متحدہ میں افغانستان کی نشست کے لیے طالبان کے نامزد نمائندے سہیل شاہین اس وقت اسلام آباد میں نائب سفیر تھے جو طالبان حکومت کے خاتمے کے بعد جلاوطنی میں اس کے ترجمان بن گئے تھے۔