امریکی ایوی ایشن کمپنیوں یونائیٹڈ اور ڈیلٹا ایئرلائنز کی جانب سے اعلان کیا گیا ہے کہ اُنہوں نے اومیکرون کے بڑھتے کیسز کے باعث کرسمس کے روز 200 سے زائد پروازیں منسوخ کردی ہیں۔

شکاگو کی یونائیٹڈ ایئرلائنز نے آج کی 120 پروازیں منسوخ کردیں جبکہ اٹلانٹا کی ڈیلٹا ایئرلائنز نے 90 کے قریب فلائٹس کینسل کی ہیں۔

یونائیٹڈ ایئرلائنز کے ترجمان کا کہنا ہے کہ وہ منسوخ کی گئی پروازوں کے مُسافروں کو اِس بارے میں اطلاع دے رہے ہیں تاکہ وہ ایئرپورٹ آنے کی زحمت سے بچ سکیں۔

ترجمان کے مطابق رواں ہفتے کورونا ویریئنٹ اومیکرون کے بڑھتے کیسز کا براہِ راست اثر پروازوں کے عملے اور دیگر آپریشن چلانے والے ملازمین پر بھی پڑا ہے جس کے سبب پروازیں منسوخ کی جا رہی ہیں۔

دوسری جانب ڈیلٹا ایئرلائنز کے ترجمان نے بتایا ہے کہ اُنہوں نے جمعہ کے روز کی 90 پروازوں کی منسوخی سے قبل اپنے عملے اور پروازوں سے متعلق تمام تر ذرائع اور متبادل انتظامات کی جانچ پڑتال کی ہے۔

ڈیلٹا ایئرلائنز کی جانب سے پروازوں کی منسوخی کی وجوہات موسم کی خرابی اور اومیکرون کیسز میں اضافہ بتایا گیا ہے۔

اِس سے پیشتر ڈیلٹا ایئرلائنز کے چیف ایگزیکٹیو ایڈ بیسچیئن نے امریکی مراکز برائے ڈیزایز کنٹرول اینڈ پریوینشن (سی ڈی سی) کے سربراہ سے درخواست کی تھی کہ وہ مکمل طور پر ویکسین شدہ مسافروں کے لیے قرنطینہ کی 10 روزہ مُدت کو کم کرکے 5 روز کردیں۔