کرسمس سے دو روز پہلے برطانیہ میں  پہلی بار کورونا کیسز کی یومیہ تعداد ایک لاکھ سے تجاوز کرگئی ہے۔

برطانوی میڈیا کے مطابق حکومتی اعداد و شمار بتاتے ہیں کہ آج پہلی بار پورے برطانیہ میں 106,122  کورونا کیسز ریکارڈ ہوئے ہیں۔

گزشتہ ایک ہفتے کے دوران کورونا کے یومیہ کیسز کی شرح میں 35 فیصد  اضافہ ریکارڈ ہوا ہے۔

 کورونا کیسز کی شرح میں اضافہ ایسے وقت میں ہوا ہے جب ویلز نے نئے سال  کے لیے سخت پابندیوں کا اعلان کیا  ہے جو کہ بورس جانسن پر بھی لاک ڈاؤن مزید سخت کرنے کے لیے دباؤ ڈال سکتا ہے۔

تاہم اعداد و شمار سے ایسے اشارے بھی ملتے ہیں کہ کورونا کیسز کی ہفتہ وار شرح نمو سست ہو رہی ہے۔ کورونا کی ہفتہ وار شرح 52 فیصد سے کم ہے۔

واضح رہے کہ گزشتہ روز ہی برطانوی حکومت نے کرسمس کے پیش نظر کورونا متاثرین کے لیے بڑے ریلیف کا اعلان  کرتے ہوئے قرنطینہ کی مدت 10 روز سے کم کرکے 7 روز کرنے کا اعلان کیا تھا۔

کرسمس کے موقع پر کورونا متاثرین کیلئے بڑی خوشخبری

برطانوی حکومت نے گزشتہ روز کورونا متاثرین  کے قرنطینہ کے قوانین میں تبدیلی  کی  تھی جس کے تحت وہ اپنے اہل خانہ کے ساتھ کرسمس کے تہوار سے محفوظ طریقے سے لطف اندوز ہو سکیں گے۔

نئے قانون کے تحت 15  سے 17 دسمبر  تک  کورونا وائرس کا شکار ہونے والے 2 لاکھ 80 ہزار سے زائد افراد  اپنے پیاروں کے ساتھ کرسمس کا لطف اٹھانے کے لیے آزاد ہوں گے۔

تاہم وہ غیر ویکسین شدہ بالغ افراد جو کورونا سے متاثرہ کسی شخص سے رابطے میں آئے تھے  انہیں وائرس سے متاثر ہونے کی ممکنہ مدت یعنی 10  روز تک قرنطینہ میں گزارنے ہوں گے۔