فارماسیوٹیکل کمپنی فائزر نے دعویٰ کیا ہے کہ کلینیکل ٹرائلز میں کورونا سے بچاؤ کی گولی کے کارآمد ہونے کی تصدیق ہوئی ہے۔ فائزر نے یہ دعویٰ بھی کیا ہے کہ یہ گولی اومیکرون ویریئنٹ کے خلاف بھی مؤثر ہے۔

اے ایف پی کے مطابق فائزر کے چیف ایگزیکٹیو افسر البرٹ بورلا نے ایک بیان میں کہا ہے کہ اینٹی کووڈ گولی نے ایسے افراد میں اموات کی شرح کو 90 فیصد تک کم کیا ہے جنہوں نے کورونا کی علامات ظاہر ہونے کے پہلے چند دنوں میں اس کا استعمال کیا تھا۔

اینٹی کووڈ گولی کے ٹرائلز 2200 سے زائد افراد پر کیے گئے اور اس کے ابتدائی نتائج کا گزشتہ ماہ اعلان کیا گیا تھا۔

فائزر کے چیف ایگزیکٹیو کا کہنا تھا کہ نئی میڈیسن جس کا نام ’’پیکسلووِڈ‘‘ رکھا گیا ہے زندگیاں بچا سکتی ہے۔

کمپنی کے مطابق ٹرائلز کے نتائج بتاتے ہیں کہ اگر کورونا کی علامات ظاہر ہونے کے تین سے پانچ دن کے اندر پیکسلووِڈ کا استعمال شروع کیا جائے تو زیادہ متاثر ہونے کے خطرے سے دوچار افراد کے اسپتال میں داخلے کے امکان کو 90 فیصد تک کم کیا جا سکتا ہے۔

ادھر جنوبی افریقا میں کی گئی ایک تحقیق کے نتائج کے مطابق فائزر ویکسین کی دو خوراکیں اومیکرون ویریئنٹ کے شدید اثرات سے 70 فیصد تک تحفظ فراہم کرتی ہیں۔