بیجنگ: چین میں حکام نے کورونا پابندیوں کی خلاف ورزی کرنے والوں کی سڑکوں پر پریڈ کروادی ہے۔

غیر ملکی خبر رساں ادارے کے مطابق چین میں کورونا پابندیوں کی خلاف ورزی کرنے والوں کو انوکھی سزا دیتے ہوئے حکام نے ان کی سڑکوں پر پریڈ کروادی جسے دیکھنے کے لیے لوگوں کی بڑی تعداد جمع ہوگئی۔

چینی حکام کا کہنا ہے کہ اس پریڈ کا مقصد کورونا پابندیوں کی خلاف ورزی کرنے والوں کی حوصلہ شکنی کرنا اور انہیں تنبیہ کرنا ہے جبکہ اس پریڈ کے لیے سیکیورٹی اہلکاروں کی بھی بڑی تعداد موجود تھی تاہم اس پریڈ کے باعث حکام کو شدید تنقید کا سامنا کرنا پڑا ہے۔

ویڈیو میں دیکھا جاسکتا ہے کہ پریڈ میں موجود لوگوں کو خصوصی طور پر کورونا کا حفاظتی لباس پہنایا گیا تھا جبکہ ان کی گردن میں پلے گارڈ بھی لٹکائے رکھے تھے جس پر ان کی تصاویر اور نام درج تھا۔

ویڈٰیو میں دیکھا گیا ہے کہ پریڈ میں موجود ہر ایک شخص کے ساتھ دو اسلحہ ساز سیکیورٹی اہلکار موجود ہیں جبکہ سیکیورٹی اہلکاروں نے انہیں گھیرے میں رکھا ہوا ہے۔

واضح رہے کہ چین میں 2010 سے کسی بھی مجرمانہ سرگرمیوں میں ملوث ہونے والے افراد کو عوامی طور پر شرمندہ کرنے پر پابندی عائد کررکھی ہے لیکن چین میں عوامی طور پر شرمندہ کرنے کا عمل دوبارہ شروع کردیا گیا ہے۔

رپورٹس کے مطابق چین کی مقامی حکومت کی جانب سے رواں سال اگست میں دوبارہ عوامی طور پر شرمندہ کرنے کا قانون نافذ کیا ہے جس کا اطلاق صحت کے قوانین توڑنے والوں پر کیا جائے گا۔