برطانیہ نے کرسمس کے موقع پر کورونا متاثرین کے لیے بڑے ریلیف کا اعلان کردیا۔

برطانوی میڈیا کے مطابق برطانوی حکومت نے کورونا متاثرین  کے قرنطینہ کے قوانین میں تبدیلی  کی ہے جس کے بعد وہ اپنے اہل خانہ کے ساتھ کرسمس کے تہوار سے محفوظ طریقے سے لطف اندوز ہو سکیں گے۔

حکومت نے برطانیہ کے ڈھائی لاکھ سے زائدکورونا متاثرین کے لیے قرنطینہ کی مدت 10 روز سے کم کرکے 7 روز کردی ہے۔

برطانوی ہیلتھ سیکیورٹی ایجنسی  کی جانب سے جاری کردہ بیان میں کہا گیا ہے کہ  جو لوگ کورونا وائرس کا شکار ہیں وہ 10 کے بجائے سات دن بعد قرنطینہ سے نکل سکتے ہیں بشرطیکہ وہ اس مدت کے اختتام پر دو ’لیٹرل فلو ٹیسٹ ‘ کروائیں۔

نئے قانون کے تحت 15  سے 17 دسمبر  تک  کورونا وائرس کا شکار ہونے والے 2 لاکھ 80 ہزار سے زائد افراد  اپنے پیاروں کے ساتھ کرسمس کا لطف اٹھانے کے لیے آزاد ہوں گے۔

تاہم وہ غیر ویکسین شدہ بالغ افراد جو کورونا سے متاثرہ کسی شخص سے رابطے میں آئے تھے  انہیں وائرس سے متاثر ہونے کی ممکنہ مدت یعنی 10  روز تک قرنطینہ میں گزارنے ہوں گے۔

دریں اثنا کورونا سے متعلقہ صحت کے عملے کی کمی برطانیہ کی مشکل میں اضافہ کررہی ہے  ۔

دوسری جانب برطانوی وزیر اعظم بورس جانسن نے گزشتہ رات اعلان کیا  ہے کہ کرسمس یقینی طور پر  محتاط انداز میں منائی جائے گی۔

تاہم برطانیہ کے اعلیٰ سائنس دانوں نے مشورہ دیا کہ قومی صحت کے سسٹم پر مزید تناؤ سے نمٹنے کے  لیے کرسمس کے بعد پابندیوں کی ضرورت ہوسکتی ہے۔