بھارتی ریاست اتر پردیش (یو پی) کی حکومت نے انتہا پسندی کی تمام حدوں کو پار کرلیا۔

یو پی حکومت نے اردو ادب کے معروف شاعر کے انتقال کے 100 سال بعد ان کا نام اکبر الہ آبادی سے تبدیل کرکے اکبر پریاگ راجی کردیا ہے۔

سید اکبر حسین رضوی المعروف اکبر الہ آبادی کا نام ریاست یو پی کے  اعلیٰ تعلیم سے متعلق ایک نیم سرکاری ادارے ’ہائر ایجوکیشن سروسز کمیشن‘ کی ویب سائٹ پر تبدیل کیا گیا ہے۔

ہائر ایجوکیشن سروسز کمیشن کی ویب سائٹ پر صرف اکبر الہ آبادی کا ہی نام تبدیل تبدیل نہیں کیا گیا بلکہ ان تمام شعرا  کے نام کے ساتھ پریاگ راجی لگادیا گیا ہے جو اپنے نام کے ساتھ الہ آبادی لکھا کرتے تھے جن میں  راشد الہ آبادی اور تیغ الہ آبادی کا نام بھی شامل ہے۔

واضح رہے کہ بھارتیہ جنتا پارٹی ( بی جے پی ) کی حکومت نے  2018 میں بھارت کے تاریخی شہر الہ آباد کا نام تبدیل کر  کے پریاگ راج کر دیا تھا۔

بھارتی میڈیا کی جانب سے اس حوالے سے معلومات کے لیے حکومتی عہدیداروں سے رابطہ کیا گیا تو انہوں نے واقعے سے لاعلمی کا اظہار کیا۔

 تاہم ہائر ایجوکیشن سروسز کمیشن کے ایک اعلیٰ افسر نے مبینہ طور پر   ویب سائٹ  ہیک ہونے کا خدشہ ظاہر کرتے ہوئے بتایا کہ  اس حوالے سے سائبر سیل میں شکایت درج کرادی گئی ہے۔

خیال رہے کہ اکبر الہ آبادی کا شمار برصغیر کے مشہور و معروف اردو اب کے شعرا میں ہوتا ہے۔

16 نومبر 1946 کو الہ آباد کے قریب ایک گاؤں میں پیدا ہونے والے  اکبر الہ آبادی نے شاعری میں اپنا الگ رنگ پیدا کیا۔ ان کی شہرت ظرافت آمیز اور طنزیہ اشعار پر مبنی ہے۔

بے پردہ کل جو آئیں نظر چند بیبیاں

اکبرؔ زمیں میں غیرت قومی سے گڑ گیا

پوچھا جو میں نے آپ کا پردہ وہ کیا ہوا

کہنے لگیں کہ عقل پہ مردوں کے پڑ گیا

وہ مشرقیت کے دلدادہ اور مغربی تہذیب کی تقلید کے سخت خلاف تھے۔ مغرب زدہ طبقے کو طنز و مزاح کی چٹکیاں لے کر راہ راست پر لانے کی کوشش کرتے تھے۔

تم شوق سے کالج میں پھلو پارک میں پھولو

جائز ہے غباروں میں اُڑو چرخ پہ جھولو

لیکن ایک سخن بندہٴ عاجز کا رہے یاد

اللہ کو اور اپنی حقیقت کو نہ بھولو