دنیا بھر میں اومیکرون ویریئنٹ کے پھیلاؤ کو دیکھتے ہوئے دبئی ایکسپو 2020 کی سرگرمیاں محدود کرکے نئے ایس اوپیز جاری کردیے گئے۔

اماراتی خبر ایجنسی ’’وام‘‘ کے مطابق دبئی ایکسپو 2020 میں شائقین کی تعداد 70 لاکھ کی حد عبور کرچکی ہے اور اب تک 71 لاکھ 67 ہزار 5 سو 91 افراد ایکسپو 2020 میں شرکت کرچکے ہیں۔

دبئی ایکسپو 2020 کی انتظامیہ نے شائقین کے درمیان سماجی فاصلے کو یقینی بنانے اور عوام کے رش کے باعث اومیکرون وائرس پھیلنے کے امکانات پر قابو پانے کے لیےعارضی طور پر بعض پروگرام معطل کر دیے ہیں۔

احتیاطی تدابیر کے تحت گھوم پھر کر تفریحی پروگرام پیش کرنے والے فنکاروں کو پروگرام بند کرنے کی سختی سے ہدایت کی گئی ہے۔

 دبئی ایکسپو 2020 کی انتظامیہ نے تمام کارکنان پر پابندی لگائی ہے کہ وہ ہنگامی بنیادوں پر پی سی آر ٹیسٹ کرائیں جبکہ انتظامیہ نے پی سی آر ٹیسٹ میں سہولت کے لیے طبی اداروں کی تعداد میں اضافہ کر دیا ہے۔ ایکسپو میں 4 پوائنٹ پی سی آر ٹیسٹ کے لیے مختص کردیے گئے ہیں۔

 دبئی ایکسپو 2020 میں شریک ممالک کے پویلینز کے تمام کارکنان کے لیے پی سی آر ٹیسٹ مفت کر دیا گیا ہے۔

ایکسپو میں آنے والے 18 برس اور اس سے زیادہ عمر کے تمام شائقین سے کہا گیا ہے کہ وہ ویکسین سرٹیفکیٹ یا پی سی آر ٹیسٹ رپورٹ پیش کریں گے جس کو 72 گھنٹوں سے زیادہ نہ گزرے ہوں۔ شائقین کو سماجی فاصلے اور ماسک  کے استعمال کا بھی پابند بنایا گیا ہے۔

طبی اداروں کی جانب سے کہا گیا ہے کہ احتیاطی تدابیر اختیار کرتے ہوئے مقررہ ضوابط کی سختی سے پابندی کریں، اگرکسی شخص میں کورونا کی علامات کا خدشہ ہو تو وہ فوری طور پر پی سی آر ٹیسٹ کرائے۔