کویتی حکام نے کہا ہے کہ کویت میں موجود ڈھائی لاکھ غیرملکیوں کے ڈرائیونگ لائسنس ضبط کیے جائیں گے۔

لائسنسوں کی ضبطی اور تبدیلی کے ساتھ ساتھ مستقبل میں غیر ملکیوں کو ڈرائیونگ لائسنس جاری کرنے کی شرائط سخت کرنے کا فیصلہ بھی کیا گیا ہے تاکہ ملک میں ٹریفک کے رش پر قابو پایا جا سکے۔

کویتی وزارت داخلہ نے کہا ہے کہ کویتی ٹریفک حکام پرانے ڈرائیونگ لائسنس منسوخ کرکے نئے لائسنس جاری کریں گے۔

کویتی جریدے الرای کے مطابق بعض غیرملکیوں نے جعلسازی اور فراڈ کے ذریعے ڈرائیونگ لائسنس حاصل کر رکھے ہیں۔

بیشترغیرملکی ایک ادارے سے دوسرے ادارے میں منتقل ہوگئے اور نئے آجر کے ہاں وہ ڈرائیونگ لائسنس حاصل کرنے کی شرائط پوری نہیں کر رہے ہیں۔

بہت سےغیرملکی کویت سے چلے گئے اور واپس نہیں آئے، ان کے اقامے ختم ہوگئے تاہم وہ لائسنس ہولڈر ہیں۔ اس زمرے میں آنے والے غیرملکیوں کے ڈرائیونگ لائسنس بھی ضبط کیے جائیں گے۔

کویتی حکام کا کہنا ہے کہ ٹریفک کمیٹی کو لائسنس ضبط کرکے نئے لائسنس جاری کرنے میں متعدد مسائل پیش آئیں گے کیونکہ 30 لاکھ سے زائد لائسنسوں کی ضبطی اور تبدیلی آسان کام نہیں ہے۔

ایک تخمینے کے مطابق ضبط کیے جانے والے 30 لاکھ لائسنسوں میں سے 10 لاکھ کے لگ بھگ ایسے ہیں جن کی جگہ نئے لائسنس جاری ہونے ہیں۔