متحدہ عرب امارات کے شہر دبئی میں بلین ڈالرز سرمایہ کاری سے جاری ایکسپو 2020 کو کورونا کے بڑھتے کیسز کے باعث بندش کا خطرہ لاحق ہوگیا۔

اِس خدشے کا اظہار عملے کے اراکین کے کورونا میں مبتلا ہو جانے کے بعد کیا جا رہا ہے۔

منتظمین کا کہنا ہے کہ صفائی اور سینیٹائزیشن کے عمل کے باعث ایکسپو 2020 کے کچھ حصوں کو عارضی طور پر بند کیا جا سکتا ہے۔ اِس حوالے سے ایکسپو کے متاثرہ مقامات کی نشاندہی نہیں کی گئی۔

اومیکرون ویریئنٹ کی دریافت کے 3 ہفتوں کے اندر متحدہ عرب امارات میں کورونا وائرس سے متاثرہ کیسز کی تعداد میں یکدم خاصا اضافہ ہوا اور یہ 37 تک پہنچ گئی۔

دبئی حکومت کے سرکاری میڈیا کے غیر واضح بیان کے مطابق عالمی وبا کے بڑھتے پھیلاؤ کے دوران ایک عظیم الشان نمائش کا انعقاد بڑے چیلنج سے دوچار ہے۔

دبئی ایکسپو 2020 کا آغاز کورونا وبا کے باعث ایک سال کی تاخیر سے رواں برس اکتوبر میں ہوا تھا۔ اماراتی حکومت نے دعویٰ کیا تھا کہ اِس کے تیز ویکسینیشن پروگرام کے سبب اقتصادی صورتحال بہتر ہو جائے گی جو مغربی ممالک کی نسبت زیادہ متاثر ہوئی تھی۔

ایکسپو 2020 انتظامیہ نے مختلف احتیاطی تدابیر کا اطلاق بھی کیا تھا جن میں داخلے کے لیے ماسک کا استعمال، ویکسینیشن سرٹیفکیٹ یا حالیہ منفی پی سی آر رپورٹ لازمی قرار دیے گئے تھے لیکن تیزی سے منتقل ہونے والے اومیکرون وائرس نے، جو ویکسین سے حاصل شدہ قوتِ مُدافعت کو دھوکا دینے کی صلاحیت کا حامل ہے، ایکسپو کو نئے امتحان سے دوچار کر دیا ہے۔

ایکسپو 2020 میں حالیہ ہفتوں میں ہوئے بڑے کانسرٹس میں کسی قسم کا سماجی فاصلہ دیکھنے میں نہیں آیا جہاں کثیر تعداد میں لوگ ایک دوسرے سے جُڑے میوزک پر ہاتھ لہراتے رہے۔

دبئی میں موسمِ سرما کا سیاحتی سیزن عروج پر ہے اور ایسے میں ایکسپو 2020 مزید اہمیت اختیار کر گئی ہے۔ دنیا بھر سے لاکھوں سیاح دبئی کا رُخ کر چکے ہیں۔