سعودی ولی عہد شہزادہ محمد بن سلمان اور بحرینی ولی عہد شہزادہ سلمان بن حمد نے مناما کے ’’الصخیرپیلس‘‘ میں سعودی بحرین رابطہ کونسل کے دوسرے اجلاس کی سربراہی کی۔ اجلاس میں دونوں ملکوں کی اعلیٰ شخصیات نے شرکت کی۔

اجلاس میں فریقین نے رابطہ کونسل کے جنرل سیکریٹریٹ کی رپورٹ کا بھی جائزہ لیا جس میں ذیلی کمیٹیوں کی جانب سے کی جانے والی کوششوں اور  اجلاسوں کی متعدد سفارشات اور اقدامات پراطمینان کا اظہار کیا گیا۔

فریقین نے مشترکہ دلچسپی کے علاقائی اور بین الاقوامی مسائل پر تعاون و مشاورت کو مضبوط بنانے، بین الاقوامی سطح پر اپنے سیاسی عمل کو وسیع کرنے کے علاوہ علاقائی سلامتی، استحکام اور خطے کی خوشحالی کے لیے کیے جانے والے اقدامات کو سراہا۔

رابطہ کونسل اجلاس میں دنوں ممالک کے وزرائے خارجہ کے مابین طے شدہ سیاسی مشاورت سے ہم آہنگ ہونے اور سعودی بحرینی نوجوانوں میں انتہا پسندانہ نظریات کے خلاف کام کرنے کے علاوہ انتہا پسندانہ نظریات کے لیے کی جانے والی فنڈنگ کے ذرائع کو ختم کرنے کے متعدد اقدامات پرمشترکہ معاہدہ  کیا گیا۔

مشترکہ اجلاس میں دوطرفہ تجارت، سائبر سکیورٹی، موسمیاتی تبدیلی، قابل تجدید توانائی، انفراسٹرکچر، تعلیم، کھیل، ثقافت، صحت، میڈیا اور سیاحت کے شعبوں میں متعدد اقدامات زیر بحث آئے۔

سعودی اور بحرینی شہزادوں نے امن اور عسکری امور میں بھی دو طرفہ تعاون جاری رکھنے پر اتفاق کیا۔