امریکا نے افغانستان میں او آئی سی کے کردار کا پرتپاک خیر مقدم کیا ہے۔

غیر ملکی خبر رساں ادارے کے مطابق امریکا کے نمائندہ خصوصی برائے افغانستان تھامس ویسٹ نے افغانستان میں اسلامی تعاون تنظٰیم کے کردار کا پرتپاک خیر مقدم کیا ہے۔

رپورٹ کے مطابق امریکا کی جانب سے یہ تبصرہ او آئی سی کے وزرائے خارجہ کونسل کے 17 ویں غیر معمولی اجلاس کے بعد سامنے آیا ہے۔

واضح رہے کہ او آئی سی کا غیر معمولی اجلاس سعودی عرب کی جانب سے بلایا گیا تھا جس کی میزبانی پاکستان نے کی ہے جبکہ اس اجلاس کا مقصد مسلمانوں اور دیگر ممالک سمیت بین الاقوامی اداروں کو افغانستان کی مدد کے لیے اکٹھا کرنا تھا۔

اس اجلاس میں او آئی سی نے اپنے جنرل سیکرٹریٹ میں انسانی ہمدردی، ثقافتی اور خاندانی امور کے اسسٹنٹ سیکرٹری جنرل سفیر طارق علی بخیت کو افغانستان کے لیے خصوصی نمائندہ مقرر کرنے کا فیصلہ کیا ہے۔

خیال رہے کہ اس اجلاس میں او آئی سی رکن ممالک ، غیر رکن ممالک سمیت عالمی تنظیموں کے 70 کے قریب وفود نے شرکت کی تھی۔

اجلاس میں افتتاحی خظاب کرتے ہوئے پاکستان کے وزیر خارجہ شاہ محمود قریشی کا کہنا تھا کہ پاکستان نے 40 سال قبل 1980 میں بھی افغانستان پر او آئی سی وزرائے خارجہ اجلاس طلب کیا تھا۔

شاہ محمود قریشی کا کہنا تھا کہ افغانستان میں سرمایہ کاری کو فروغ دینا ہے، آج ہمارے پاس موجوں کو پلٹانے کا ایک سنہری موقع ہے۔