یوکرائن کے صدر وولودیمیر زیلنیسکی نے بین الاقوامی میڈیا سے گفتگو کرتے ہوئے مغرب سے اپیل کی کہ وہ روس سے کشیدگی کے معاملے پر خوف و ہراس پیدا نہ کریں کیونکہ اس سے یوکرائن کی کمزور معیشت میں سرمایہ کاری کو مزید نقصان پہنچا ہے۔

صدر زیلنیسکی نے کہا کہ مغرب اور میڈیا جس طرح روس سے کشیدگی کے معاملے کو اچھال رہے ہیں یوکرائن کے عوام کو اس کی بھاری قیمت ادا کرنا پڑے گی۔

امریکی صدر بائیڈن نے جمعرات کے روز کہا تھا کہ وہ سمجھتے ہیں روس اگلے ماہ یوکرائن پر حملہ کرسکتا ہے تاہم روسی وزیر خارجہ نے ایک بار پھر اِن خبروں کی تردید کرتے ہوئے کہا تھا کہ روس جنگ نہیں چاہتا۔

اس وقت یوکرائن کی سرحد پر تقریباً ایک لاکھ روسی افواج تعینات ہیں لیکن صدر زیلنیسکی کا کہنا تھا کہ اُنہیں کوئی بڑا خطرہ نظر نہیں آتا کیونکہ گزشتہ موسم بہار میں بھی روسی فوج سرحد پر موجود تھے۔

یوکرائنی صدر نے دارالحکومت کیف میں پریس کانفرنس سے خطاب کرتے ہوئے کہا کہ بعض قابل احترام سربراہان مملکت بھی ایسے اشارے دے رہے ہیں جیسے کل ہی جنگ شروع ہو جائے گی۔ اُنہوں نے مزید کہا کہ ملک میں عدم استحکام کہیں زیادہ بڑا خطرہ ہے۔

یوکرائنی صدر نے اگرچہ روس سے فوجی تصادم کو یکسر مسترد نہیں کیا تاہم اُن کا یہ ضرور کہنا تھا کہ وائٹ ہاؤس جنگ کے خطرے کو بڑھا چڑھا کر پیش کرکے غلطی کر رہا ہے اور وہ یہ بات صدر بائیڈن کو گزشتہ روز فون پر بتا چکے ہیں۔

گزشتہ روز روس نے امریکا کی طرف سے موصول ہونے والی بعض تحریری تجاویز کو کسی حد تک منظور کرنے کا اشارہ دیا ہے۔ روسی وزیر خارجہ سرگئی لاوروف کے مطابق امریکا کی جانب سے بھیجی گئی جوابی تجاویز نیٹو کی طرف سے بھیجی جانے والی تجاویز سے زیادہ بہتر ہیں۔

اگرچہ ابھی امریکی اور نیٹو تجاویز سامنے نہیں آئیں تاہم امریکا کا کہنا ہے کہ نیٹو کی توسیع روکنے کا روسی مطالبہ قابلِ قبول نہیں۔

روس میں امریکی سفیر جان سلیوان کے مطابق امریکی تجاویز میں فوجی مشقوں اور یورپ میں میزائلوں کی تنصیب روکنا شامل ہیں اور امریکا اب روس کے جواب کا منتظر ہے۔