بھارتی پولیس نے مسلم خواتین کی نیلامی کی ایپ میں تصویریں اپ لوڈ کرنے کے کیس کے ماسٹر مائنڈ کو گرفتار کرنے کا دعویٰ کیا ہے۔

بھارتی میڈیا کے مطابق دارالحکومت نئی دہلی کی پولیس نے مسلم خواتین کی ایک ایپ کے ذریعے جعلی نیلامی کے معاملے کے مبینہ ماسٹر مائنڈ کو حراست میں لینے کا دعویٰ کیا ہے۔

25 سال اومکریشور ٹھاکر کو اندور شہر سے گرفتار کیا گیا ہے جب کہ اس کا لیپ ٹاپ بھی تحویل میں لے لیا گیا ہے۔

مزید پڑھیے: بھارت میں مسلمان خواتین کی ایک بار پھر آن لائن نیلامی

نئی دہلی پولیس نے اومکریشور ٹھاکر کو اس قدر خفیہ طریقے سے گرفتار کیا ہے کہ اس سلسلے میں مقامی پولیس کو بھی آگاہ نہیں کیا گیا۔

پولیس نے کہا ہے کہ اومکریشور نے مسلمان خواتین کی جعلی نیلامی کے لیے ’سُلی ڈیلز‘ نامی انٹرنیٹ ایپلی کیشن بنانے کاا اعتراف کرلیا ہے۔

مزید پڑھیے: خواتین کی آن لائن نیلامی: بھارت میں سکھ مسلم فساد کی سازش

اومکریشور نے اپنے اعترافی بیان میں کہا ہے کہ وہ ٹوئٹر پر ایک گروپ ’ٹریڈ مہاسبھا‘ کا رکن تھا جس کا مقصد مسلمان خواتین کو بدنام اور انہیں سوشل میڈیا پر ٹرول کرنا تھا۔

مبینہ ماسٹر مائنڈ نے بتایا ہے کہ اس نے ہوسٹنگ پرووائڈر کمپنی (گٹ ہب)کا ایک کوڈ بنارکھا تھا، جسے اس نے گروپ کے دیگر لوگوں کو بھی فراہم کیا تھا، اسی کوڈ کے ذریعے گروپ کے افراد نے ایپ مٰں مسلم خواتین کی تصویریں اپ لوڈ کیں۔

واضح رہے کہ چند روز قبل بھارت میں ایک ایپ منظر عام پر آئی تھی جس میں بھارت کی مختلف شعبوں میں خدمات سرانجام دینے والی مسلم خواتین کی تصویریں اپ لوڈ کی گئی تھیں ، اس کے ساتھ یہ دعویٰ کیا گیا تھا کہ یہ خواتین نیلام کی جارہی ہیں۔