اردن میں رہائش پذیر غربت سے تنگ پاکستانی نژاد معمر خاتون اچانک امیر ہوگئیں۔

خاتون جن کا نام عذرا قدسیہ کفایت اللہ خان ہے، غربت و افلاس سے تنگ آ کر مدد کی درخواست لیے ایک سرکاری امدادی ادارے گئیں جہاں انہیں معلوم ہوا کہ وہ تو خاصی مالدار ہیں۔ خاتون اس بات سے لاعلم تھیں کہ ان کے بینک اکاؤنٹ میں خطیررقم موجود ہے۔

 2008ء سے خاتون عذرا قدسیہ کے کھاتے میں پینشن کی رقم جمع ہو رہی تھی جس کا انہیں علم ہی نہیں تھا۔

الامارات الیوم کے مطابق خاتون عذرا قدسیہ 1970ء کی دہائی میں پاکستان سے اردن ملازمت کے لیے آئی تھیں۔ وہ اردن کے ہسپتالوں میں دائی کے طور پر خدمات انجام دے رہی تھیں۔ ریٹائر ہونے کے بعد بھی وہ رضاکارانہ طور پر یہ  خدمات انجام دیتی رہیں۔

ریٹائر ہونے پر اردن کی حکومت نے عذرا قدسیہ کو ان کی 50 سالہ خدمات کے اعتراف میں اردن کی شہریت بھی دے دی تھی۔ عذرا قدسیہ کو پتہ نہیں تھا کہ ان کی پنشن کی مد میں ہر ماہ پابندی سے ایک رقم اُن کے بینک اکاؤنٹ میں جمع ہو رہی ہے کیونکہ اُنہیں اردن کے پینشن سسٹم کی معلومات ہی نہیں تھیں۔

دو روز قبل ان کی زندگی کی کایا اُس وقت پلٹی جب اُنہوں نے اردنی صوبے المفرق کے متعلقہ حکام سے مدد کی درخواست کی۔

عذرا قدسیہ نے خواہش ظاہر کی کہ اب جبکہ وہ ریٹائرمنٹ کی زندگی گزار رہی ہیں اور صحت مزید کام کرنے کی اجازت نہیں دیتی لہذا اُنہیں گزر بسر کے لیے سرکاری اعانت کی ضرورت ہے۔

 عذرا قدسیہ کی اِس درخواست پر یہ انکشاف ہوا کہ 2008ء سے اُن کے نام پر باقاعدہ ہر ماہ جمع ہونے والی پینشن کی رقم اتنی ہے کہ وہ ایک اچھی پرآسائش زندگی گزار سکتی ہیں۔ ان کے اکاؤنٹ میں 45 ہزار اردنی دینار جمع ہیں جو 63 ہزار امریکی ڈالر سے بھی زیادہ رقم ہے۔