امریکا حالیہ موسمِ سرما کے دوران ایک مرتبہ پھر شدید برف باری کے باعث سردی کی نئی لہر کی لپیٹ میں ہے۔

برفانی طوفان کی نئی پیش گوئی کے مطابق شمالی اور جنوبی کیرولائنا کی ریاستوں سے مین تک مزید برف باری جبکہ ساحلی علاقوں میں شدید طوفانی ہوائیں چلیں گی۔

نیو انگلینڈ  کے خطے میں 2 فٹ تک برف پڑ چکی ہے اور محکمہ موسمیات کے حکام کا کہنا ہے کہ ساحلی علاقوں میں طوفان کی آمد کا بھی خدشہ ہے۔

مشرقی امریکا میں شدید برف باری کے باعث مصروف ترین ایئر پورٹس پر 5 ہزار سے زائد پروازیں منسوخ جبکہ پانچ ریاستوں میں ہنگامی حالت نافذ کر دی گئی ہے۔

ریاست مین، نیو ہیمپشائر، ورمونٹ، میسا چیوسیٹس، رہوڈز آئی لینڈ، کنیکٹیکٹ، نیویارک، نیو جرسی، ڈیلا ویئر، میری لینڈ اور ورجینیا کی ریاستوں میں برفانی طوفان کی وارننگ جاری کر دی گئی ہے۔

بوسٹن کی میئر مشیل وُو کا کہنا ہے کہ اگرچہ برف باری معمول کی بات ہے لیکن یہ طوفان تاریخی ثابت ہو سکتا ہے۔

شدید برف باری کی وجہ سے ان متاثرہ ریاستوں میں جمعہ سے اتوار کے درمیان 5 ہزار سے زائد پروازیں منسوخ کر دی گئی ہیں۔

ایمٹرک ریل کمپنی نے بوسٹن اور واشنگٹن کے درمیان اپنی خدمات کو معطل اور محدود کر دیا ہے۔

ریاست میسا چیوسیٹس نے دیگر ریاستوں سے مُنسلک شاہراہوں پر بھاری ٹریفک کی آمد و رفت پر پابندی عائد کردی ہے۔

ریاست ورجینیا میں برفانی طوفان کی وجہ سے انٹر اسٹیٹ 95 شاہراہ پر سینکڑوں ڈرائیور محصور ہو کر رہ گئے  ہیں۔

موسمیاتی ماہرین کے مطابق سرد ہواؤں اور گرم سمندری ہواؤں کے ملاپ سے فضا کا دباؤ تیزی سے گرنے کے باعث بم جیسے اثرات کا حامل طوفان آئے گا۔

امریکی نیشنل ویدر سروس کی جانب سے جاری ہدایات میں عوام سے کہا گیا ہے کہ صرف ضروری صورت میں ہی سفر کریں اور سردی سے بچاؤ کی کٹ اپنے ہمراہ رکھیں۔ طوفان میں پھنس جانے کی صورت میں اپنی گاڑی میں ہی رہیں۔