کمبوڈیا کا مگاوا نامی ہیرو چوہا زندگی کے 8 کامیاب سال گزار کر بالآخر چل بسا۔

جی جناب! یہ کوئی معمولی چوہا نہیں تھا۔ اِس ہیرو چوہے نے اپنے 5 سالہ کریئر میں 100 سے زائد بارودی سرنگوں اور بارودی مواد کا پتا چلایا۔

اپنی بہادری سے ہزاروں لاکھوں جانیں بچانے اور اپنے فرض سے محبت پر برطانیہ کے ادارے پیپلز ڈسپنسری فار سِک اینیملز نے 2020ء میں مگاوا نامی اِس چوہے کو ایک ہیرو کی طرح طلائی تمغے سے نوازا۔

جون 2021ء میں ریٹائر ہونے والا مگاوا تنزانیہ میں پیدا ہوا جسے ایک بین الاقوامی امدادی ادارے اے پی او پی او نے بارودی سرنگوں کی تلاش میں مدد دینے کے مقصد سے 2016ء میں کمبوڈیا منتقل کیا تھا۔

اِس ادارے کے مطابق جو چوہوں کو بارودی سرنگیں اور ٹی بی کے مرض کا پتا چلانے کے لیے استعمال کرتا ہے، مگاوا اپنے مقصد میں سب سے کامیاب چوہا ثابت ہوا تھا۔

واضح رہے کہ دہائیوں سے خانہ جنگی سے متاثرہ ملک کمبوڈیا میں دنیا بھر میں سب سے زیادہ بارودی سرنگیں پائی جاتی ہیں۔ اب بھی یہاں 1 ہزار اسکوائر کلومیٹر رقبہ بارودی سرنگوں سے اٹا ہوا ہے۔

کمبوڈیا 40 ہزار متاثرین کے ساتھ اُن ممالک میں شامل ہے جہاں بارودی سرنگوں کی زد میں آ کر ہاتھ پیر گنوانے والے افراد کی شرح سب سے زیادہ ہے۔

پیر کے روز بھی کمبوڈیا کے تھائی لینڈ کی سرحد کے قریب واقع صوبے پریویر میں تین اہلکار بارودی سرنگیں صاف کرنے کے دوران ہوئے دھماکے میں ہلاک ہو گئے تھے۔

بین الاقوامی امدادی ادارے اے پی او پی او کے مطابق ہیرو چوہے مگاوا نے کمبوڈیا میں رہائش پذیر عوام کو سکون سے جینے، کام کرنے اور محفوظ رہنے میں بڑا کردار ادا کیا ہے۔

امدادی ادارے اے پی او پی او کے ترجمان کا کہنا ہے کہ ہیرو چوہے کو اعزاز کے ساتھ دفن کیا گیا ہے۔