مسیحیوں کے روحانی پیشوا پوپ فرانسس کا کہنا ہے کہ آج ہم خود غرضی کی ایک نئی شکل دیکھ رہے ہیں کہ کچھ لوگ بچہ پیدا نہیں کرنا چاہتے مگر جانور شوق سے پالتے ہیں۔

پوپ فرانسس نے ویٹیکن سٹی میں موجود عقیدت مندوں سے والدین سے متعلق بات چیت کرتے ہوئے اس بات پر افسوس کا اظہار کیا کہ بعض اوقات پالتو جانور معاشرے میں بچوں کی جگہ لے لیتے ہیں۔

پوپ کے مطابق بچے پیدا نہ کرنا ماں اور باپ کے کردار کی نفی ہے، یہ ہمیں کم تر بناتی ہے اور ہمیں انسانیت سے دور لے جاتی ہے۔

پوپ فرانسس کا کہنا تھا کہ بعض اوقات والدین کے پاس صرف ایک اولاد ہوتی ہے لیکن ان کے پاس کئی کتے اور بلیاں ہوتی ہیں اور یہ جانور بچوں کی جگہ لے لیتے ہیں۔

پوپ نے مزید کہا کہ اس طرح تہذیب انسانوں کے بغیر پرانی ہوتی جاتی ہے کیوںکہ ہم ماں اور باپ جیسے رشتے کو کھو رہے ہیں۔

پوپ فرانسس کی پالتو کتوں کے ساتھ تصاویر دیکھی جا چکی ہیں لیکن اُن کے پاس کوئی بھی پالتو جانور نہیں ہے۔

2014ء میں بھی ایک اخبار کو انٹرویو دیتے ہوئے پوپ فرانسس کا کہنا تھا کہ بچوں کی جگہ پالتو جانوروں کو پالنا ثقافتی تنزلی کی ایک مثال ہے کیونکہ والدین اور بچوں کے درمیان پیچیدہ جذبات کے مقابلے میں پالتو جانوروں کے ساتھ جذباتی تعلق قائم کرنا زیادہ آسان ہوتا ہے۔

انہوں نے کہا کہ وہ والدین جو کسی طبی مسئلے کی وجہ سے بچے پیدا نہیں کر سکتے انہیں چاہیے کہ وہ بچوں کو گود لے لیں اور والدین بننے سے نہ گھبرائیں۔ پوپ نے کہا کہ بچے پیدا کرنے میں خطرہ تو ہے لیکن بچے نہ پیدا کرنا زیادہ خطرناک ہے۔