متحدہ عرب امارات نے یمن کےحوثی باغیوں کا بیلسٹک میزائل حملہ ناکام بناتے ہوئے 80 باغی ہلاک کردیے ہیں۔

غیر ملکی خبر رساں ادارے کی رپورٹ کے مطابق عرب فوجی اتحاد نے 24 گھنٹوں کے دوران حوثی باغیوں کے ٹھکانوں پر  25 ٹارگٹڈ حملے کرنے کا دعویٰ کیا ہے جبکہ حوثی باغیوں کی 11 فوجی گاڑیوں اور 80 سے زائد باغیوں کو ہلاک کرنے کا دعویٰ بھی کیا گیا ہے۔

رپورٹ کے مطابق اماراتی وزارت دفاع کا کہنا ہے کہ فضا میں تباہ کیے جانے والے میزائل کا ملبہ غیرآباد والے علاقے میں گرا جس کے باعث خوش قسمتی سے کوئی جانی نقصان کی اطلاع موصول نہیں ہوئی ہے۔

واضح رہے کہ اس سے قبل سعودی عرب کی سرکاری خبر ایجنسی کی رپورٹ میں عرب اتحادی افواج برائے یمن کا صوبے مارب میں حوثی باغیوں کے ٹھکانوں پر 24 ٹارگٹڈ آپریشن کے دوران 70 حوثی باغیوں کے مارے جانا کا دعوی کیا گیا تھا۔

ایک بیان میں عرب عسکری اتحاد کے ترجمان بریگیڈیئر جنرل ترکی المالکی نے یمن کے صوبے صعدہ میں واقع جیل پر ہونے والے حملے پر حوثیوں کے دعوے کو غلط قرار دیتے ہوئے اسے عوام کو گمراہ کرنے کی کوشش قرار دیا تھا۔

ان کا کہنا تھا کہ جس جگہ پر حملہ کیا گیا وہ حوثی باغیوں کا خاص کیمپ تھا اور قانونی حیثیت کا حامل فوجی ہدف تھا۔

یہ بھی پڑھیں: یمن، عرب عسکری اتحاد کی کارروائی، 70 حوثی باغی ہلاک، 16 فوجی گاڑیاں تباہ

دوسری جانب اقوم متحدہ کی سلامتی کونسل کی جانب سے 300 صفحات پر مشتمل رپورٹ جاری کی گئی ہے جس میں یمن میں لڑائی کے دوران حوثی باغیوں کے 2 ہزار جنگجو بچے ہلاک ہونے کا انکشاف کیا گیا ہے۔

رپورٹ میں کہا گیا ہے کہ حوثی باغیوں نے یمن کی سرکاری حکومت اور سعودی عرب کی سربراہی میں اتحادی افواج سے لڑنے کے لیے 10 سے 17 سال کے لڑکوں کو بھرتی کیا ہے۔

رپورٹ کے مطابق حوثیوں نے اسکولوں اور مساجد کے بچوں کو بھرتی کے لیے استعمال کیا ہے  جبکہ ان بچوں میں 7 سال تک کے بچوں کو ہتھیاروں کی صفائی اور راکٹ حملوں سے بچنے کے طریقے سکھائے جاتے ہیں۔

اس رپورٹ کو تیار کرنے والے ماہرین کا کہنا ہے کہ ان کے پاس ایک ہزار 406 ایسے بچوں کے ناموں کی فہرست موجود ہے جو 2020 میں حوثی باغیوں کی جانب سے لڑتے ہوئے زندگی کی بازی ہار گئے۔

ماہرین کے مطابق ان بچوں میں زیادہ تر کی ہلاکتیں امران، دھامر، حجاح، حدیدہ، اب، صعدہ اور صنعا کے محاذ پر ہوئی ہیں۔