بھارتی ذرائع ابلاغ کے مطابق بھارتی بحریہ کے ایک بحری جہاز میں دھماکے سے تین اہلکار ہلاک اور متعدد زخمی ہوگئے ہیں۔

ابھی کچھ دیر قبل بھارتی وزیر دفاع کی جانب سے جاری کردہ بیان کے مطابق یہ واقعہ ممبئی میں واقع نیول ڈاک یارڈ میں پیش آیا۔ بھارتی بحریہ کے جہاز آئی این ایس رنویر کے اندرونی کمپارٹمنٹ میں ہونے والے اِس دھماکے میں تین نیوی اہلکار زخموں کی تاب نہ لاتے ہوئے ہلاک ہوگئے۔

بیان میں مزید کہا گیا ہے کہ دھماکے کے نتیجے میں بڑے پیمانے پر نقصان کی اطلاع نہیں ملی ہے۔

بھارتی خبر رساں ادارے اے این آئی کے مطابق کم از کم گیارہ اہلکار زخمی ہیں جنہیں ہسپتال منتقل کر دیا گیا ہے۔

این ڈی ٹی وی کے ذرائع کے حوالے سے کہنا ہے کہ یہ دھماکا شام ساڑھے چار بجے کے قریب ہوا اور اس کا تعلق بارود یا اسلحے کے دھماکے سے نہیں ہے تاہم اس واقعے کی انکوائری کے لیے ایک بورڈ تشکیل دے دیا گیا ہے۔

بھارتی وزارت دفاع کے بیان کے مطابق بحری جہاز کے عملے نے بروقت کارروائی کرکے حالات کو قابو میں کر لیا تھا۔ واضح رہے کہ آئی این ایس رنویر ایسٹرن نیول کمانڈ کا نومبر 2021ء سے حصہ ہے اور جلد ہی اسے بیس پورٹ پر واپس آنا ہے۔

بھارتی ذرائع ابلاغ کے مطابق آئی این ایس رنویر 21 اپریل 1986ء کو بھارتی بحریہ کے بیڑے میں شامل ہوا تھا جو سابق سویت یونین میں تیار کیا گیا تھا۔ اس قسم کے بحری جہاز سب میرینز، کروز میزائل اور نچلی پرواز کرنے والے جنگی جہازوں کے خلاف دفاع فراہم کرنے کے کام آتے ہیں۔

بھارتی بحریہ کے موجودہ چیف ایڈمرل آر ہری کمار نے بھی اپنے کریئر کے ابتدائی دنوں میں اس بحری جہاز کی کمان سنبھالی تھی۔