ترکی میں تعطیلات گزارنے کا منصوبہ بنانے والے غیر ملکی سیاحوں کے بہتر حفاظتی اقدامات نے سیاحت کے پیشے سے مُنسلک افراد کے لیے 2022ء میں امید کی نئی کرن روشن کردی ہے۔

ترک ہوٹلیئرز فیڈریشن کے مطابق گزشتہ برس سیاحت انڈسٹری کے لیے 2020ء کے مقابلے میں بہت بہتر رہا ہے۔

ترک ہوٹلیئرز فیڈریشن کی جانب سے بتایا گیا ہے کہ ترکی نے گزشتہ سال 29 ملین غیر ملکی مہمانوں کی میزبانی کی جبکہ انطالیہ، جسے سیاحت میں ’’شوکیس‘‘ کے طور پر پیش کیا جاتا ہے، نے 9 لاکھ 94 ہزار غیر ملکی مہمانوں کی میزبانی کی۔

موسمِ سرما میں ساحلی علاقوں کی سرگرمیاں سکی اور گرم پانی کے چشموں کی جانب منتقل ہو جاتی ہیں۔ ساحلی علاقوں میں کنونشن، میٹنگز اور کھیلوں کی سیاحت جیسی سرگرمیوں میں اضافہ ہو جاتا ہے۔

ترک ہوٹلیئرز فیڈریشن کے مطابق 2019ء میں تقریباً 16 ملین سیاحوں نے انطالیہ کا دورہ کیا تھا جبکہ سیاحتی صنعت 2019ء کے مقابلے میں 2021ء میں زیادہ بہتر رہی ہے۔

ترک ہوٹلیئرز فیڈریشن کے مطابق 2022ء کے لیے توقعات بہت زیادہ ہیں، بکنگ کو دیکھتے ہوئے کہا جا سکتا ہے کہ 2019ء کے اعداد و شمار جیسے اہداف کو آسانی سے حاصل کرلیا جائے گا۔

ترک ہوٹلیئرز فیڈریشن کا کہنا ہے کہ ترکی میں سیاحت کی بکنگ دیگر ممالک کے مقابلے میں زیادہ ہے اور 2022ء میں بھی اِسے یہ فائدہ حاصل رہے گا۔

ٹریول ایجنٹس اورٹریول آپریٹرز ترک ہوٹلیئرز فیڈریشن کے ساتھ قریبی رابطے میں ہیں کیونکہ برطانیہ، جرمنی، پولینڈ، روس، یوکرائن اور چیکیا سے اگلے سیاحتی سیزن کے بارے میں اچھی خبریں آنے کی امید کافی روشن ہے۔