11 ستمبر 2001ء کے دہشت گرد حملوں کے بعد بنائی گئی متنازع جیل گوانتانامو بے کو اگلے سال 20 برس مکمل ہو جائیں گے۔

انسانی حقوق کی عالمی تنظیم ایمنسٹی انٹرنیشنل نے امریکی صدر جو بائیڈن سے مطالبہ کیا ہے کہ وہ گوانتانامو بے جیل بند کرنے کا انتخابی وعدہ پورا کریں لیکن امریکی قانون ساز اس فیصلے کے خلاف ہیں۔

کیوبا میں بنائی گئی اس جیل کا مقصد دہشت گردی کے خلاف جنگ کے دوران مشتبہ غیرملکی دہشت گردوں کو حراست میں لے کر تفتیش کرنا تھا تاہم اس متنازع جیل میں اختیار کیے گئے تفتیشی طریقے تشدد کے سوا کچھ نہیں۔

ایمنسٹی انٹرنیشنل امریکا کے انسانی حقوق سے متعلق پروگرام میں سکیورٹی ڈائریکٹر ڈیفنی ایویاٹار کہتی ہیں کہ جب تک یہ جیل برقرار رہے گی تب تک عالمی سطح پر انسانی حقوق کے بارے میں امریکی ساکھ متاثر ہوتی رہے گی۔

11 January marks the terrible 20 year anniversary of the opening of Guantánamo. Join @Amnestyusa for a virtual rally alongside Guantánamo survivors, lawyers, and advocates calling on @JoeBiden to close it. Register here: https://t.co/grV301cQU5 pic.twitter.com/5HrBZ7MoNI

— Amnesty International USA (@amnestyusa) January 7, 2022

یہ جیل 12 جنوری 2002ء کو قائم کی گئی تھی اور تب سے اب تک یہاں 780 افراد کو حراست میں رکھا جا چکا ہے جن میں زیادہ تر پر فرد جرم بھی عائد نہیں کی گئی۔

اس وقت بھی اِس جیل میں 39 افراد قید ہیں جن میں 11 ستمبر کے دہشت گرد حملوں کا مبینہ ماسٹر مائنڈ خالد شیخ محمد بھی شامل ہے۔

خالد شیخ محمد سمیت چار دیگر افراد کے خلاف فوجی ٹریبونل میں مقدمہ چلایا جانا تھا تاہم دو دہائیوں بعد بھی اب تک مقدمے کی کارروائی شروع نہیں کی جا سکی۔ جیل میں قید 10 افراد ایسے بھی ہیں جنہیں رہا کیا جانا ہے۔

ایمنسٹی انٹرنیشنل جرمنی کے سربراہ ماتھیاس شرائیبر کہتے ہیں کہ گوانتانامو بے جیل قانون توڑنے، جبری گمشدگی اور تشدد جیسی انسانی حقوق کی سنگین خلاف ورزیاں کرنے والوں کے لیے ’’خطرناک مثال‘‘ قائم کر رہی ہے۔ قیدیوں کو عدالتی رسائی بھی حاصل نہیں، عالمی برادری بھی اس جیل کو بند کرنے کے لیے امریکا پر دباؤ ڈالے۔

صدر اوباما نے 2009ء میں اس جیل کو بند کرنے کا حکم دیا تھا لیکن وہ اس حکم پر عملدرآمد کروانے میں ناکام رہے جبکہ صدر ڈونلڈ ٹرمپ اس جیل کو بند کرنے کے خلاف تھے۔

صدر بائیڈن کو اپنے انتخابی وعدے کی تکمیل میں کانگریس میں سخت مخالفت کا سامنا ہے۔ موجودہ قوانین کے مطابق امریکی حکومت گوانتانامو بے سے قیدیوں کو امریکا منتقل نہیں کر سکتی۔ امریکی قانون سازوں نے قیدیوں کو امریکا یا دیگر ممالک منتقل کرنے کے لیے دفاعی بجٹ سے اخراجات سے روکنے کی شق شامل کر دی تھی۔