کابل: افغان طالبان کے وزارت خارجہ کے ترجمان کا کہنا ہے کہ افغانستان پڑوسی ممالک کے ساتھ معاملات بات چیت کے ذریعے حل کرنا چاہتا ہے۔

افغان طالبان کے وزارت خارجہ کے ترجمان عبدالقہار بلخی نے سماجی رابطے کی مائیکروبلاگنگ ویب سائٹ ٹوئٹر پر بیان جاری کیا ہے جس میں ان کا کہنا تھا کہ امارات اسلامیہ افغانستان اپنے پڑوسی ممالک کے ساتھ مسائل کو بات چیت کے ذریعے حل کرنے پر یقین رکھتا ہے۔

Recently a few of incidents have taken place along Durand line between Afghanistan and Pakistan that have given rise to the need for authorities of the two sides to address the problem. pic.twitter.com/L0t5Jt1tgf

— Abdul Qahar Balkhi (@QaharBalkhi) January 4, 2022

انہوں نے مزید کہا کہ گزشتہ دنوں میں پاک افغان سرحد میں ڈیورنڈ لائن کے قریب کچھ واقعات رونما ہوئے ہیں جس کی وجہ سے اس بات کی ضرروت محسوس ہوئی ہے کہ دونوں ممالک کے حکام اس مسئلے کو ایڈریس کریں۔

یاد رہے کہ حالیہ دنوں میں پاکستان کی جانب سے ڈیورنڈ لائن پر لگائی گئی حفاظتی باڑ کو طالبان جنگجوؤں کی جانب سے ہٹانے کی کوشش کی گئی تھی۔

خاردار باڑ اکھاڑنے کا پہلا واقعہ 19 دسمبر کو پیش آیا تھا جب طالبان جنگجوؤں کی جانب سے پاک افواج کو صوبے ننگر ہار کے ساتھ سرحدی باڑ لگانے سے روک دیا تھا جبکہ دوسرا واقعہ 30 دسمبر کو بلوچستان سے ملحق سرحد پر پیش آیا تھا۔

اس حوالے سے پاکستان کے وزیر خارجہ شاہ محمود قریشی کا کہنا تھا کہ پاک افغان سرحد پر افغان طالبان کی جانب سے خاردار باڑ اکھاڑنے کے معاملے پر خاموش نہیں ہیں بلکہ سفارتی سطح پر معاملے کو حل کرنے کی کوشش کررہے ہیں۔

انہوں نے مزید کہا تھا کہ پاک افغان سرحد پر پیدا ہونے والی صورت حال سے آگاہ ہیں، کچھ شرپسند عناصر اس معاملے کو ہوا دینا چاہتے ہیں لیکن ہم ایسا نہیں چاہتے۔