سابق برطانوی وزیر اعظم ٹونی بلیئر کے سابق امریکی صدر جارج بش سے عراق جنگ  کی حمایت کے خفیہ وعدے کا انکشاف ہوا ہے۔

غیر ملکی خبر رساں ادارے کے مطابق عراق جنگ سے متعلق سات سالہ برطانوی تحقیقات کے نتائج  میں انکشاف ہوا ہے کہ  ٹونی بلیئر نے عراق جنگ پر ہچکچاہٹ کا اظہار کیا لیکن خفیہ طور پر بش کی حمایت کا وعدہ کیا ۔

تحقیقات کے نتیجے میں عراق جنگ سے 8 ماہ قبل 28  جولائی 2002 کی ایک ذاتی خفیہ دستاویز سامنے آئی ہے جس میں اس حوالے سےانکشافات ہوئے ہیں۔

سابق برطانوی وزیر اعظم نے سابق امریکی صدر جارج ڈبلیو بش کو خط لکھا تھا کہ وہ عراق جنگ  میں ان  کی ہر صورت حمایت کریں گے۔

تحقیقاتی رپورٹ میں بلیئر کے ایک اعلیٰ معاون کے حوالے سے کہا گیا ہے کہ انہوں نے اور ایک اور مشیر نے وزیر اعظم سے وعدہ خلافی کرنے کی درخواست کی تھی لیکن بلیئر نے ان کی سفارشات کو نظر انداز کیا۔

یہ خفیہ دستاویز بلیئر کے ناقدین کے ان الزامات کو درست ثابت کرتی ہے جس میں وہ اسے واشنگٹن کے تابعدار قرار دیتے ہوئے  برطانیہ کو تباہ کن تنازعے کی طرف لے جانے کا ذمہ دار قرار دیتے ہیں۔

دوسری جانب ٹونی بلیئر نے ان خبروں کی تردید کی اور تحقیقاتی کمیٹی کو بتانے سے انکار کیا کہ انہوں نے  اپنے مشترکہ مقاصد کو کیسے پورا کیا۔

بش کو لکھے گئے نوٹ میں سابق برطانوی وزیر اعظم نے اپنے خدشات کی وضاحت کرتے ہوئے کہا تھا کہ عراقی ڈکٹیٹر صدام حسین کو اقتدار سے ہٹانا 1991 کی خلیجی جنگ کے بعد کی فوجی مداخلتوں سے کہیں زیادہ مشکل ثابت ہو سکتا ہے۔

انہوں نے مزید کہا تھا کہ  اس پر منصوبہ بندی اور حکمت عملی ابھی تک  کے سب منصوبوں سے مشکل ہوگی۔ یہ کوسووو  یا افغانستان نہیں ہے اور  نہ ہی یہ خلیجی جنگ ہے۔اس پر فوجی کارراوئی بہت خطرناک ہوگی۔

سر ڈیوڈ  جو کرافورڈ میں ٹونی بلیئر، جارج ڈبلیو بش اور مسٹر پاول کے ساتھ بات چیت میں شریک  تھے کہتے ہیں کہ ٹونی بلیئر نے بش کو بتایا کہ وہ عراق پر بمباری کرنے کے خفیہ منصوبے کی ذاتی تعلقات میں مدد کر سکتے ہیں۔

سرڈیوڈ نے بتایا کہ سابق صدر کو لکھا گیا یہ نوٹ غیر معمولی طور پر حساس تھا اور ٹونی بلیئر نے حکم دیا تھا کہ اسے  بہت احتیاط سے رکھا جائے  اور اس کی مزید کاپیاں نہ بنائی جائیں۔

واضح رہے کہ  جنگ نے عراق کو ایک فرقہ وارانہ تنازعہ میں دھکیل دیا  تھا جس میں  2009 تک کم از کم ڈیڑھ لاکھ افراد مارے گئے تھے جن میں زیادہ تر عام شہری تھے۔