امریکی نجی خلائی ادارے اسپیس ایکس کا ایک راکٹ فالکن نائن جسے 2015ء میں موسمیاتی سیٹلائٹ کو لانچ کرنے کی غرض سے خلا میں بھیجا گیا تھا، 4 مارچ کو چاند سے ٹکرانے والا ہے۔

یہ راکٹ، کار ساز کمپنی ٹیسلا کے مالک ایلون مسک کی خلائی تجرباتی کمپنی اسپیس ایکس کی ملکیت ہے جو انسانوں کو دوسرے سیاروں تک لے جانے کے منصوبے پر کام کر رہی ہے۔

اسپیس ایکس کی ٹیم کے رکن اور ماہر فلکیات جوناتھن میکڈوول نے برطانوی نشریاتی ادارے بی بی سی کو بتایا ہے کہ یہ اپنی نوعیت کا پہلا واقعہ ہوگا، مشن کی تکمیل کے بعد فالکن نائن راکٹ میں اتنا ایندھن نہیں بچا تھا کہ وہ واپس زمین پر پہنچ سکے۔

پروفیسر جوناتھن میکڈوول کے مطابق یہ 4 ٹن وزنی دھات کا ایک ٹینک ہے جو 5 ہزار میل فی گھنٹہ کی رفتار سے ایک چٹان سے ٹکرائے گا جس سے ایک چھوٹا سا مصنوعی گڑھا بن جائے گا۔

2015ء سے زمین، چاند اور سورج کی مختلف کشش ثقل اس راکٹ کو کئی سمتوں میں کھینچ چکی ہیں جس کی وجہ سے اس کا راستہ گڈمڈ ہوگیا۔

پروفیسر جوناتھن میکڈوول کہتے ہیں ابھی تک تو خلا میں پھیلے ہوئے کوڑے کرکٹ سے کوئی خطرہ نہیں لیکن مستقبل میں ہوسکتا ہے اگر چاند پر بستیاں قائم ہوتی ہیں تو ہمیں خلائی کوڑے کرکٹ کے بارے میں معلومات کی ضرورت ہوگی۔

پروفیسر جوناتھن میکڈوول نے کہا کہ ابھی خلا میں کچرے کی مقدار زیادہ نہیں لیکن ہمیں اس وقت تک انتظار نہیں کرنا چاہیے جب یہ ایک مسئلے کی شکل اختیار کرلے۔

فالکن نائن راکٹ کشش ثقل کے اصول کے تحت چاند کی جانب بڑھتا رہے گا اور 4 مارچ کو چاند سے ٹکرا کر پاش پاش ہو جائے گا۔