روس نے گزشتہ ماہ اپنی پیش کردہ سکیورٹی تجاویز کے بارے میں امریکا کی جانب سے بالآخر تحریری جواب موصول ہونے کا اعلان کیا ہے۔

روس وزارت خارجہ کے جاری کردہ بیان کے مطابق ماسکو میں امریکی سفیر جان سلیوان روس وزارت خارجہ گئے جہاں اُنہوں نے روس کے نائب وزیر خارجہ الیگزینڈر گرشکو سے ملاقات کی اور اُنہیں روس کی سکیورٹی تجاویز کے بارے میں امریکا کا تحریری جواب پیش کیا۔

امریکا کی جانب سے اس بارے میں جاری کردہ بیان میں کہا گیا ہے کہ ہم سفارتی حل کو ترجیح دیتے ہیں اور مذاکرات کے لیے تیار ہیں۔ تحریری جواب کے متن کا اعلان نہیں کیا جائے گا اور ہم روس سے بھی اسی روّیے کی توقع رکھتے ہیں۔

امریکی وزیر خارجہ انتھونی بلنکن نے کہا ہے کہ جواب میں روس کو امریکا اور اس کے اتحادیوں کے خدشات سے آگاہ کر دیا ہے، اب یہ روس پر منحصر ہے کہ وہ کیا کرتا ہے۔ ہم ہر صورتحال کے لیے تیار ہیں، روس کے یوکرائن پر حملے کی صورت میں ہم عالمی توانائی بحران پیدا ہونے کی اجازت نہیں دیں گے۔ ہم نے روس کی یوکرائن کو نیٹو میں شامل نہ کرنے کی تجویز بھی مسترد کر دی ہے۔

دوسری طرف نیٹو کے سیکرٹری جنرل ہینز اسٹالٹن برگ نے بھی روس کی طرف سے سکیورٹی ضمانتوں سے متعلق معاہدے کی تجویز کا تحریری جواب دینے کا اعلان کیا ہے۔ پریس کانفرنس سے خطاب میں اسٹالٹن برگ نے کہا ہے کہ نیٹو نے امریکا کے ساتھ ہی روس کو تحریری تجاویز بھیج دی ہیں۔

انہوں نے روس سے دیگر ممالک کے خلاف زور زبردستی کے استعمال سے پرہیز کرنے کی اپیل کی اور کہا ہے کہ ہم حقیقی مذاکرات کے لیے تیار ہیں۔

یوکرائن کی نیٹو رکنیت کے بارے میں انہوں نے کہا ہے کہ نیٹو اپنی کھُلے دروازے کی پالیسی کو جاری رکھے گا۔ یوکرائن پر حملہ کرنے کی صورت میں روس کو اس کا بھاری خمیازہ چُکانا پڑے گا۔

واضح رہے کہ روس نے دسمبر میں نیٹو اور امریکا کو بھیجی گئی سکیورٹی ضمانتوں کے معاہدے کی تجاویز میں مطالبہ کیا تھا کہ نیٹو مشرقی یورپ میں اپنی توسیع نہ کرنے کی یقین دہانی کرائے جبکہ امریکا سابق سوویت ریاستوں میں اور نیٹو رکنیت نہ رکھنے والے ممالک میں فوجی بیس قائم کرے، نہ کسی فوجی کاروائی کے لیے ان ممالک کے انفراسٹرکچر کو استعمال کرے اور نہ ہی ان ممالک کے ساتھ فوجی تعاون کرے۔