امریکی صدر جو بائیڈن نے ایک بار پھر اپنے یوکرائنی ہم منصب وولودیمیر زیلنسکی کو یقین دہانی کرائی ہے کہ روسی حملے کی صورت میں واشنگٹن فیصلہ کن جواب دے گا۔

خبر ایجنسی اے ایف پی کے مطابق وائٹ ہاؤس سے جاری کیے گئے بیان میں بتایا گیا ہے کہ صدر بائیڈن نے وولودیمیر زیلنسکی سے ٹیلی فون پر گفتگو میں کہا کہ اگر روس نے یوکرائن پر حملہ کیا تو امریکا اور اس کے اتحادی جواب دیں گے۔

وائٹ ہاؤس کی پریس سیکرٹری جین ساکی نے بتایا کہ روس کی جانب سے یوکرائن کی سرحد پر ممکنہ جارحیت کی صورت میں امریکی صدر نے یوکرائن کے صدر کو ساتھ دینے کی یقین دہائی کرائی ہے۔

یوکرائن کی مدد کرنے کی یہ یقین دہائی اس بیان کے چند دن بعد سامنے آئی ہے جس میں صدر بائیڈن نے روس کے صدر کو یوکرائن کے خلاف کسی بھی فوجی کارروائی کی صورت میں نتائج سے خبردار کیا تھا۔

صدر بائیڈن سے فون پر گفتگو کے بعد یوکرائن کے صدر نے ٹویٹ میں لکھا کہ وہ امریکی حمایت پر شکرگزار ہیں اور یہ دونوں ملکوں کے بہترین تعلقات کا ثبوت ہے۔

https://twitter.com/ZelenskyyUa/status/1477766426945536001?s=20

خیال رہے کہ جمعے کو صحافیوں سے بات چیت میں امریکی صدر جو بائیڈن نے کہا تھا کہ انہوں نے یوکرائن کے معاملے پر روسی صدر ولادیمیر پیوٹن کو خبردار کیا ہے۔

انہوں نے کہا تھا کہ اگر روس یوکرائن کے معاملے پر آگے بڑھتا ہے تو امریکا بھی یورپ میں اپنی موجودگی بڑھا دے گا۔

یوکرائن نے گزشہ ہفتے اپنے ایک فوجی کی ماسکو کے حامی علیحدگی پسندوں کے ساتھ لڑائی میں ہلاکت کا دعویٰ بھی کیا تھا۔

نئے سال کے آغاز پر اپنے خطاب میں یوکرائن کے صدر وولودیمیر زیلنسکی نے کہا تھا کہ مشرق میں جنگ کا خاتمہ ان کا بنیادی مقصد ہے۔