کویت میں دو سینئر فوجی افسران پر یورو فائٹر ٹائفون طیاروں کی خریداری کے معاہدے میں بدعنوانی کے شبہے میں گزشتہ روز انسداد بدعنوانی کے تحقیقاتی ادارے کو قانونی کارروائی کے لیے کہا گیا ہے۔

کویت کی فضائیہ کو فراہم  کیے جانے والے 28 یورو فائٹر ٹائفون طیاروں کے آرڈر میں سے دو جنگی طیارے گزشتہ ماہ موصول ہوئے ہیں۔

کویت کی اینٹی کرپشن اتھارٹی نزاہہ نے اپنے ایک بیان میں کہا ہے کہ تحقیقات سے واضح ہوتا ہے کہ مدعا علیہان کی جانب سے متعدد خلاف ورزیوں کا ارتکاب ہوا ہے۔

کویت کے انسداد بدعنوانی کے محکمے نے بتایا ہے کہ وزارتِ دفاع کی جانب سے طیاروں کی خریداری کے معاہدے پر رپورٹ موصول ہوئی ہے جس میں افراطِ زر کی شق پر خصوصی توجہ دلائی گئی ہے۔

بیان میں مزید بتایا گیا کہ تحقیقات سے یہ بات سامنے آئی ہے کہ مدعا علیہ نے مینوفیکچرر کو معاہدے میں طے شدہ کل مالیت سے زیادہ بل ادا کرکے مالیاتی نقصان پہنچانے والی متعدد خلاف ورزیاں کی ہیں۔

رپورٹ میں مزید انکشاف ہوا ہے کہ یہ تمام عمل وزارتِ دفاع اور وزارتِ خزانہ میں متعلقہ حکام سے پیشگی اجازت اور دستاویزی ثبوت کے بغیر ہوا ہے جس سے مذکورہ معاہدے کے لیے مختص ادائیگیوں کا شیڈول متاثر ہوا۔

تحقیقاتی ادارے نزاہہ کا کہنا ہے کہ کویت کی فوج کے ایک میجر جنرل اور کرنل کو پبلک فنڈز کے مبینہ غلط استعمال پر استغاثہ کا سامنا کرنا پڑے گا۔

حکام نے پبلک فنڈز کے بے دریغ استعمال کے بارے میں معلومات فراہم کرنے کے لیے حکومت کی مدد کرنے میں نامعلوم ذرائع کا شکریہ ادا کیا ہے اور کہا ہے کہ اس سے متعلق مزید شواہد اکٹھے کرنے اور تحقیقات کی کوششیں کی جا رہی ہیں۔