غیر سرکاری تنظٰیم جینوسائیڈ واچ کی جانب سے بھارت میں مسلمانوں کی نسل کشی کا ایمرجنسی الرٹ جاری کیا گیا ہے۔

امریکا کی غیر سرکاری تنظٰیم (این جی او) جینوسائیڈ واچ کے بانی پروفیسر اسٹینٹن نے بھارت کے لیے نسل کشی کی ہنگامی حالت کا اعلان کرتے ہوئے کہا کہ بھارت اس وقت مسلمانوں کی نسل کشی کے آٹھویں مرحلے میں داخل ہوچکا ہے۔

ان کا کہنا تھا کہ بھارت مسلمانوں کی مکمل نسلی پامالی سے صرف ایک قدم دور ہے جبکہ بھارتی وزیراعظم مسلمانوں کی نسل کشی ہوتی دیکھ کر خوش ہوتے ہیں اور آر ایس ایس نفرت سے بھری نازی طرز کی تنظیم ہے جو ہٹلر کو سراہتی ہے۔

پروفیسر اسٹینٹن ’نسل کشی کے 10 مراحل‘ نظریے کے معمار ہیں جبکہ ان خیالات کا اظہار انہوں نے شکاگو میں ورچوئل تقریب سے خطاب کے موقع پر کیا۔

اس تقریب میں امریکہ، کینیڈا اور دیگر ممالک سے تقریباً چار سو کمیونٹی اور بین المذاہب رہنماؤں نے شرکت کی تھی جبکہ جسٹس فار آل کی جانب سے جینو سائیڈ واچ کی طرف نسل کشی کے ہنگامی حالات کی تائید کی ہے۔

واضح رہے کہ اس سے قبل عالمی تنظیم جینوسائیڈ واچ کی جانب سے بھارت میں مسلمانوں کی نسل کشی کا ایمرجنسی الرٹ جاری کیا گیا تھا۔

جینوسائیڈ واچ کی جانب سے مقبوضہ کشمیر میں بھارتی مظالم اور کشمیریوں کی نسل کشی سے متعلق الرٹ جاری کرتے ہوئے بھارت سے مقبوضہ کشمیر میں نسل کشی روکنے کا مطالبہ کیا گیا تھا۔

الرٹ جاری کرتے ہوئے عالمی تنظیم کا کہنا تھا کہ مقبوضہ کشمیر میں انسانی حقوق کی خلاف ورزیاں، جنسی زیادتی، تشدد اور جبری قید کا سلسلہ جاری ہے اور مسلمان رپنماؤں کو جلا وطن کرنے کی کوشش کی جارہی ہے۔

انہوں نے کہا تھا کہ مقبوضہ کشمیر میں نقل و حرکت اور میڈیا پر پابندی لگادی گئی ہے جبکہ کشمیری مسلمان شہریوں کے مقابلے میں جدید اسلحہ سے لیس 6 لاکھ ہندو اور سکھوں اور مشتمل بھارتی فوج ہے۔

جینو سائیڈ واچ نے کہا تھا کہ بھارتی فوج 2016 سے اب تک 70 ہزار سے زائد کشمیریوں کو شہید کرچکی ہے جبکہ 1990 تک ہندو پنڈت معاشی طور پر حاوی تھے اور بی جے پی نے پچھلے 5 سالوں میں اقتدار میں آکر ہندوؤں کو دوبارہ مضبوط کیا۔