یوکرائن کے وزیر خارجہ دیمیترو کولیبا نے آج کہا ہے کہ ممکنہ روسی حملے کے بڑھتے ہوئے خدشات کے درمیان ماسکو سے مذاکرات کے دوران ضروری ہے کہ ہوشیار اور ثابت قدم رہا جائے۔

فرانسیسی خبر رساں ادارے اے ایف پی نے مغربی ممالک کا حوالہ دیتے ہوئے کہا ہے کہ روس نے یوکرائن کی سرحدوں کے پاس ایک لاکھ سے زائد فوجی اور بھاری ہتھیار تعینات کیے ہوئے ہیں۔

یوکرائن کی وزارتِ خارجہ نے ایک بیان میں کہا ہے کہ دیمیترو کولیبا نے اپنے فرانسیسی ہم منصب ژاں یوس لی ڈریان سے بات کرتے ہوئے دارالحکومت کیف سے اپنے سفارتی عملے کے اہل خانہ کو نہ نکالنے کے فیصلے پر فرانس کا شکریہ ادا کیا ہے۔

یوکرائنی وزارتِ خارجہ کے بیان کے مطابق دونوں جانب سے روس کے ساتھ رابطوں میں چوکنا اور ثابت قدم رہنے کی اہمیت پر زور دیا گیا ہے۔ انہوں نے کیف اور ماسکو کے درمیان تنازع کے سیاسی اور سفارتی تصفیے کو فروغ دینے کا سلسلہ جاری رکھنے کا بھی کہا ہے۔

خیال رہے کہ گزشتہ روز امریکی صدر جو بائیڈن نے کہا تھا کہ وہ جلد ہی مشرقی یورپ میں نیٹو کی موجودگی میں اضافے کے لیے امریکی فوجیوں کی ایک مختصر سی تعداد بھیجیں گے۔

گزشتہ روز فلاڈیلفیا سے واپسی کے بعد دارالحکومت واشنگٹن میں امریکی صدر جو بائیڈن نے صحافیوں کو بتایا کہ وہ بہت جلد مشرقی یورپ اور نیٹو کے رکن ممالک میں فوجی بھیج رہے ہیں مگر بہت زیادہ نہیں۔

واضح رہے کہ مغربی یورپ کے بیشتر حصوں میں پہلے ہی سے امریکا کے لاکھوں فوجی تعینات ہیں۔