ترک صدر رجب طیب اردوان کے متحدہ عرب امارات  کے دو روزہ دورے سے دونوں ممالک کے تعلقات میں نئے دور کا آغاز ہونے جا رہا ہے۔

اِس تاریخی دورے پر صدر اردوان کا ابوظہبی کے ولی عہد محمد بن زید النہیان نے استقبال کیا اور اس موقع پر میڈیا سے بات کرتے ہوئے صدر اردوان نے کہا کہ یہ دورہ متحدہ عرب امارات کے ساتھ اگلے پچاس برس کی دوستی اور بھائی چارے کی بنیاد رکھنے میں اہم ثابت ہوگا۔

صدر اردوان کا یہ دورہ ترکی کی جانب سے 2013ء کے بعد پہلا اعلیٰ سطحی دورہ ہے۔ اس عرصے میں دونوں ممالک کئی علاقائی تنازعات اور مشرقی بحیرہ روم میں گیس کی تلاش سے منسلک بحران سے گزر چکے ہیں۔

تعلقات کی بہتری سے خلیجی تیل کا بڑا برآمد کنندہ امارات ترکی کے ساتھ تجارتی حجم کو دگنا یا تین گنا بڑھانے اور لاجسٹک سپورٹ سے عالمی منڈیوں تک پہنچنے کا ارادہ رکھتا ہے۔

ترک صدر اردوان نے اپنے دورے سے ایک روز قبل اماراتی اخبار خلیج ٹائمز کے لیے مضمون بھی لکھا جس میں اُنہوں نے علاقائی امن، استحکام اور خوشحالی کے حصول کے لیے دو طرفہ تعاون کو مضبوط کرنے کی اہمیت پر زور دیا۔ صدر اردوان نے لکھا کہ ترکی موسمیاتی تبدیلی کے علاوہ پانی اور خوراک کی حفاظت جیسے مختلف پہلوؤں پر تعاون کو فروغ دینا چاہتا ہے۔

اِس دورے کے دوران دونوں ممالک کے درمیان 13 معاہدے کیے گئے جن میں دفاع، تجارت، ماحولیاتی تبدیلی، صنعت اور معیشت سے متعلق اربوں ڈالر کے معاہدے شامل ہیں۔

صدر اردوان دورے کے دوسرے روز دبئی بھی جائیں گے جہاں وہ ایکسپو 2020ء میں ترکی کے قومی دن کی تقریبات میں شرکت کریں گے۔

واضح رہے کہ گزشتہ سال نومبر میں ابوظہبی کے ولی عہد شہزادہ محمد بن زید نے ترک دارالحکومت انقرہ کا دورہ کیا تھا جو نو سال بعد امارات کی جانب سے اعلیٰ سطحی دورہ تھا۔

ولی عہد شہزادہ محمد بن زید  کے اس دورے کے دوران متحدہ عرب امارات نے ترکی کے توانائی اور صحت کے شعبوں میں اسٹریٹجک سرمایہ کاری کے لیے 10 ارب ڈالر کا فنڈ مختص کیا جبکہ دونوں ممالک نے کئی سلامتی، اقتصادی اور تکنیکی معاہدوں پر بھی دستخط بھی کیے تھے۔

ترکی اور متحدہ عرب امارات کے درمیان تعلقات عرب سپرنگ کے بعد پیدا ہونے والی صورتحال کے باعث کشیدہ ہوگئے تھے۔ دونوں ممالک لیبیا کے تنازع میں بھی مختلف فریقوں کا ساتھ دے رہے تھے۔ ترکی نے متحدہ عرب امارات پر کرد ملیشیا کی حمایت کا الزام بھی عائد کیا تھا۔